Bakı sakini arvadına görə 3 nəfəri bıçaqladı

Bakının Nizami rayonunda qardaşın ərdə olan bacısını döyməsi qanlı hadisəyə səbəb olub. Rayon Polis İdarəsindən Milli.Az xəbər portalına verilən məlumata görə, hadisə yanvarın 25-də saat 20:30 radələrində Qara Qarayev prospektində yerləşən mənzillərdən birində baş verib.

Bakı şəhər sakini 25 yaşlı İlkin Abdullayev münaqişə zəminində 23 yaşlı qaynı Səid Cəbrayılova, onun bacısı oğlanları - 24 yaşlı Fərid Əliyev və 16 yaşlı Ağaəliyə bıçaqla xəsarət yetirib.

Qanlı hadisəyə səbəb isə Səid Cəbrayılovun dünən axşam saatlarında bacısını döyməsi olub. Belə ki, İlkin axşam evə gələndə arvadının ağladığını görüb. Ondan bunun səbəbini soruşduqda, qardaşı Səid tərəfindən döyülməsi cavabını alıb. Bundan sonra İlkin qaynı ilə hesab çəkmək üçün onu görüşə çağırıb. Təyin olunan yerə Səid bacısı uşaqları ilə gəlib. Mübahisə zamanı İlkin cibində olan bıçaqla hər üç şəxsə xəsarət yetirib.
Yaralılar xəstəxanaya yerləşdirilib. Fərid Əliyevin vəziyyəti orta-ağırdır, Ağaəli Əliyev və Səid Cəbrayılov isə ilkin tibbi yardım göstərildikdən sonra buraxılıb.

Faktla bağlı araşdırma aparılır. Nizami rayon Polis İdarəsinin 24-cü polis bölməsindən Milli.Az xəbər portalına bildirildi ki, qohumlar hadisədən sonra barışıblar və şikayətləri yoxdur.

Anar Məmmədov
Milli.Az