Ölkə

Ölümlə hədələnən qadın üç günlük körpəsi ilə birlikdə sığınacağa yerləşdirilib

27 Mart 2020 14:05
3 Şərh     Baxış: 1 626

Ailə, Qadın və Uşaq Problemləri üzrə Dövlət Komitəsi respublikamızın bölgələrindən birində baş vermiş məişət zorakılığı halı ilə əlaqədar çoxsaylı zəng və müraciətləri nəzərə alaraq məsələ ilə bağlı bəzi məlumatları ictimaiyyətin diqqətinə çatdırmağı vacib hesab edir.

Milli.Az xəbər verir ki, Komitədən Trend-ə verilən məlumata görə, bu günlərdə müvafiq rayonda Dövlət Komitəsinin tabeliyində fəaliyyət göstərən (rayonun və zərərçəkənin adı konfidensiallığın qorunması məqsədilə qeyd olunmur) Uşaq və Ailələrə Dəstək Mərkəzinə üç günlük körpəsi ilə birgə həyat yoldaşı və onun ailəsi tərəfindən evə buraxılmayan bir qadın müraciət edib. Üzərində şəxsiyyətini təsdiq edən sənədi olmayan qadın sənədinin götürülməsi üçün evə dönəcəyi halda ölümlə hədələndiyini, getməyə heç bir yeri olmadığını və valideynlərinin də onu qəbul etmədiyini bildirib.

Uşaq və Ailələrə Dəstək Mərkəzi rayon icra hakimiyyəti yanında "Gender zorakılığı və uşaqlara qarşı zorakılıq üzrə yerli monitorinq qrupu" ilə birgə təcili toplanaraq məsələnin həlli istiqamətində müzakirə aparıb. Qadının yaxın ailə üzvləri ilə aparılan söhbətlərə baxmayaraq, onun öz valideynlərinin evinə yerləşdirilməsi belə mümkün olmayıb.

"Məişət zorakılığının xüsusiyyətini və bu zəmində indiyədək baş vermiş qətl hadisələrini əsas götürərək, analoji hallar baş verdiyi təqdirdə zərərçəkənin yaşadığı və hədələndiyi ailəyə hətta polisin göstərişi olduğu halda yenidən qaytarılmasının böyük risk olduğu baş vermiş bu hadisə zamanı da nəzərə alınıb. Belə ki, Ailə, Qadın və Uşaq Problemləri üzrə Dövlət Komitəsinin məsələ ilə bağlı tövsiyə və göstərişinə müvafiq olaraq, körpəsi ilə axşam saatlarında küçədə qalmaq məcburiyyətində olan qadın Uşaq və Ailələrə Dəstək Mərkəzində polisin iştirakı ilə müvəqqəti yerləşdirilib. Ana və uşaq lazımi qida və yataq yeri ilə təmin edilib, hadisə ilə bağlı mövcud qaydalara uyğun qiymətləndirmə aparılıb, fərdi hal qovluğu açılaraq iş protokollaşdırılıb.

Növbəti gün ana və körpəsi Bakı şəhərində yerləşən "Təmiz Dünya" sığınacağına yerləşdirilib. Hazırda qadın və uşağın vəziyyəti normaldır və sığınacağın sosial işçiləri tərəfindən operativ dəstək proqramına cəlb edilib. Məsələ ilə bağlı Dövlət Komitəsi, Uşaq və Ailələrə Dəstək Mərkəzi, müvafiq sığınacaq, yerli icra hakimiyyətinin monitorinq qrupu və Daxili İşlər Nazirliyi birgə fəaliyyətlərini davam etdirəcək.

Ailə, Qadın və Uşaq Problemləri üzrə Dövlət Komitəsi bir daha cəmiyyətimizdə baş verən zorakılıq və etinasızlıq hallarını təəssüf hissi ilə qeyd edir. Bu gün bütün dünyanı əhatə edən koronavirus pandemiyası ilə mübarizə apardığımız, dövlətimizin ailələrin qayğısına qaldığı çətin bir dövrdə bəzi ailələr daxilində baş verən məsuliyyətsiz və zorakı davranışları kəskin şəkildə pisləyir. Cəmiyyətin əsas aparıcı qüvvəsi olan ailələrimizdə bir-birimizə tolerant, qarşılıqlı hörmət, qayğı, sevgi və məsuliyyət hissi ilə yanaşmağa, uşaqlara və yaşlılara qarşı daha həssas davranmağa çağırırıq", - məlumatda qeyd olunub.

Milli.Az

loading...

Şərh yaz:

3 Şərh:

  • Anonim
    asi · 27 Mart 14:1634

    Bəs səbəb?? Qadını körpə uşaqla hətta öz ailəsi də qəbul etmirsə, uşağın başqasına aid olduğu fikrindədirlər...Əks halda niyə hətta polisin göstərişi ilə evə qayıtması risk olsun?.. Birdəki bu qadın bütün hamiləliyi boyu harada yaşayıb??

    Cavab yaz
  • Anonim
    Joker · 27 Mart 14:2710

    Virus tutmaz belələrini.Vicdansız yığını.

    Cavab yaz
  • Anonim
    Alsu. · 27 Mart 16:4840

    Koronavirusdan da beşbetər olub bəzi vicdansız kişilər və ailələr .Yaxşı , kişi qəbul etmirsə qadını , bəs bunun öz doqma valideynləri , qardaş bacısı niyə qəbul etmirlər öz övladlarını , bacılarını ? Qorxurlar ki , bir qarın yeməklərinə şərik olarlar ? Hər dəfə bu cur vicdansızlıqları görəndə nifrət edirəm bu kimi insanlara .Ən cətin anımda əgər mənim valideynlərim yanımda olmayacaqlarsa , hec mənə lazım deyil o valideynlər ! Nə olursa , olsun , qucaqında körpəsi olan bir qadına qarşı bu cur yanaşmaq olmaz! İnsanlıqı bu dərəcədə öldurməyək ! Rəhimli , vicdanlı olaq ! Hec kim , hec nədən sıqortalanmayıb , bu cətin gunlərimizdə bir daha həmrəy olaq , bir birimizə qucaq acaq , tikəmizi böluşək !

    Cavab yaz

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.