Məktəb direktoru "düz yol"undan döndü

Xəbər verdiyimiz kimi, Binə qəsəbəsi S.Abbasov adına 117 saylı tam orta məktəbinin "2s" sinfində şagird sıxlığı ilə bağlı valideynlərin Milli.Az-a şikayət məktubları daxil olub.

Övladlarına görə narahat olan valideynlər - Bilinmir, bura məktəbdir, yoxsa bazar?! - YENİLƏNİB

Belə ki, valideynlər bu sinifdəki şagird sıxlığına məktəb direktoru tərəfindən bir əncam çəkilməsini istəyərək, ən azından bir neçə şagirdin digər siniflərə köçürülməsini tələb ediblər.

Xatırladaq ki, məqaləni hazırlayarkən məktəb rəhbərliyi ilə əlaqə saxlasaq da, direktor açıqlama verməkdən imtina edərək bildirib:

"Bizim ixtiyarımız yoxdur ki, media nümayəndələrinə məktəb barədə məlumat verək. İstəyirsizsə, məktəb barədə Bakı Şəhəri üzrə Təhsil İdarəsindən soruşa bilərsiz".

Lakin, məsələ tərəfimizdən işıqlandırıldıqdan sonra məktəbdən "ixtiyarımız yoxdur" deyilən daxili məsələ ilə bağlı cavab məktubu gələrək valideynlərin şikayətlərinin əsassız olduğu iddi edilib:

"Məktəbin ikinci siniflərində 14 sinif komplekti üzrə 420 şagird təhsil alır. Bu siniflərdən ikisi sağlam təhsil sinifi olduğu üçün hər birində 24, digər iki sinifdə isə yeni işə qəbul olan müəllimlər olduğu üçün təcrübəli müəllimlərlə müqayisədə daha az şagirdin təhsil alması məqsədəuyğun hesab edilib".

Lakin valideynlər bildirir ki, məqalədən dərhal sonra Aygün Ağayevanın rəhbəri olduğu "2s" sinifində şagirdlərin sayı 35 nəfərdən 29 nəfərə endirilib. Beləliklə "2s" sinifindəki şagird sıxlığı probleminə son qoyulub.

Sonda qeyd etmək lazımdır ki, məsələnin şagirdlərin xeyrinə həll olunması və narazılığın bitməsi sevindirici haldır. Maraqlıdır ki, bizi "məsələnin yanlış şəkildə ictimailəşdirilməsində" günahlandıran və açıqlama verməkdən imtina edən məktəb rəhbərliyini sonda öz "doğru" bildiyi qərarından döndərən səbəb nə olub.