Övladlarına görə narahat olan valideynlər - Bilinmir, bura məktəbdir, yoxsa bazar?! - YENİLƏNİB

17:15

Milli.Az-ın valideynlərin şikayəti əsasında yazdığı məqaləyə 117 saylı məktəbdən cavab məktubu göndərilib.

Məktubda valideynlərin dediklərinin əsassız olduğu iddia edilir:  

"Belə ki, məktəbin II siniflərində 14 sinif komplekti üzrə 420 şagird təhsil alır. Bu siniflərdən ikisi sağlam təhsil sinfi olduğu üçün hər birində 24, digər iki sinifdə isə yeni işə qəbul olan müəllimlər olduğu üçün təcrübəli müəllimlərlə müqayisədə daha az şagirdin təhsil alması məqsədəuyğun hesab edilib.

Odur ki, məktəb adına əsassız fikirlərin səsləndirilməsi və qarşı tərəfin mövqeyi öyrənilmədən məsələnin yalnış şəkildə ictimailəşdirilməsi təəssüf doğurur".

Milli.Az olaraq bildiririk ki, yazı hazırlanan zaman qarşı tərəfin mövqeyini öyrənməyə çalışmışıq. Lakin məktəbdən mətbuata açıqlama verilmədiyi deyilmiş və əməkdaşımızı Bakı Şəhəri üzrə Təhsil İdarəsinə yönləndirilmişdilər. Bu məqamı yazıda da qeyd etmişik.

----------
12:39

Belə məktəb, belə təhsil olar?!

Yeni tədris ilinin artıq iki aydan çoxdur başlanmasına baxmayaraq, bir sıra məktəblərdə ənənəvi problemlərin çoxu hələ də öz həllini tapmayıb. Belə problemlərdən biri də siniflərdə şagird sıxlığıdır. Belə ki, bəzi məktəblərdə bir sinifdə 30-35 şagird təhsil alır. Halbuki buna təhsil alır demək çətindir. Əgər nəzərə alsaq ki, bir dərsin müddəti cəmi 45 dəqiqədir, o zaman bu müddət ərzində müəllimin 35 şagirdə fərdi yanaşmasından söhbət belə gedə bilməz. Bu isə təhsilin keyfiyyətinə birbaşa təsir edən amillərdəndir.

Belə problem Bakının Xəzər rayonu, Binə qəsəbəsi S.Abbasov adına 117 saylı tam orta məktəbində də yaşanır. Milli.Az-a valideynlər tərəfindən daxil olan şikayət məktubundan belə məlum olur ki, bəzi siniflərdəki şagird sıxlığı süni şəkildə yaradılır.

Onların sözlərinə görə, adıçəkilən orta məktəbin bəzi ibtidai siniflərində artıq yetərincə şagirdin təhsil almasına baxmayaraq, siniflərə hələ də yeni şagirdlərin yerləşdirilməsi davam edir. Halbuki, digər paralel siniflərdə şagird sayı daha azdır: "Bəzi paralel ibtidai siniflərdə 25-29 şagird olduğu halda, Aygün Ağayevanın sinif rəhbəri olduğu "2s"ə 35 şagird verilib. Həmin şagirdlərdən bəziləri fiziki qüsurlu və dərs prosesinə çətin alışanlardır. Harda görünüb ki, bu qədər uşağı bir sinfə yığasan? Belə məktəb, belə təhsil olar?! Bilinmir bura məktəbdir, yoxsa bazar! Biz dövlətimizin yaratdığı şəraitlə övladlarımızın normal təhsil almasını istəyirik, daha belə yox. Belə təhsillə Azərbaycan dünyada kiminlə və necə rəqabət aparacaq, necə inkişaf edəcək?!"

Məsələ ilə bağlı valideynlər məktəb direktoru Elvin Səlimova narazılığını bildiriblər. O isə deyilənə görə problemi həll etmək əvəzinə həmin sinfə daha bir uşaq gətirib. Bundan sonra əsəbləri tarıma çəkilən həm valideynlər, həm də sinif rəhbəri məktəbin direktorunun qəbulunda olub, buna qəti etiraz ediblər. Direktor isə onu "yola verməyi" xahiş edib: "Sinif rəhbəri Aygün müəllimə direktora sinifdəki sıxlıqla bağlı çətinlik yarandığını bildirdi. Çünki şagird çox olduğundan onlara dərsi tam çatdırmaq mümkün olmur. Direktor isə müəlliməyə bunun problem olmadığını və onu "yola verməyi" tapşırdı. Daha məktəbin direktoru da məsələni həll etmək əvəzinə belə deyir və narazılıqlara məhəl qoymayaraq bildiyini edirsə, onda biz nə etməliyik? Dərdimizə kim çarə etsin?"

Bəhs edilən məsələyə aydınlıq gətirilməsi üçün 117 saylı məktəbin direktoru Elvin Səlimovla əlaqə saxladıq. Lakin direktor Milli.Az-a bildirib ki, o, bu barədə heç bir kütləvi informasiya vasitəsinə məlumat verməyəcək: "Bizim ixtiyarımız yoxdur ki, media nümayəndələrinə məktəb barədə məlumat verək. İstəyirsizsə, məktəb barədə Bakı Şəhəri üzrə Təhsil İdarəsindən soruşa bilərsiz".

Afaq Rza
Milli.Az