Qeyri-sabit hava kənd təsərrüfatına ziyan vurub? – YENİLƏNİB

Son günlər havanın qeyri-sabit keçməsi, yağışların yağmasının kənd təsərrüfatının məhsuldarlığına heç bir ziyanı yoxdur.

Milli.Az xəbər verir ki, bu barədə Trend-ə Milli Məclisin Aqrar siyasət komitəsinin sədri Tahir Rzayev deyib.

O bildirib ki, yaz yağışının təsərrüfatlara heç bir ciddi ziyanı yoxdur.

"Ola bilsin, ot biçilibsə, müəyyən ot sahələrinə ziyan vursun. Ancaq ümumilikdə heç bir ziyanı yoxdur. Çünki bu yağışlar uzunmüddətli deyil, bir gün yağır, səhəri gün çıxır.

Əslində, bu yağış təsərrüfatlara xeyirdir. O zaman ziyan verərdi ki, bu yağışlar bir neçə gün davam etsin. O zaman bitkilərin, o cümlədən, pambığın dibi çürüyə bilərdi. Digər bitkilərin inkişafına mane ola bilərdi. Ancaq indiki halda bu yağışların xeyri var", - deyə komitə sədri qeyd edib.

Onun sözlərinə görə, bu yağışlar həm də su ehtiyatının yığılmasıdır.

"Bu gün bütün dünyada olduğu kimi, Azərbaycanda da su çatışmazlığı var, su ehtiyyatları məhduddur. Xüsusilə yay aylarında, yazın axırlarında təsərrüfatlar suvarma suyundan ciddi korluq çəkir. Ancaq bu yağışlar yerin qatında su təbəqəsi yaradır və sözsüz ki, bu, xeyli müddət bitkilərin qidalanmasına kömək edir. Əgər sel, daşqınlar varsa, bunlar təsərrüfatlara ciddi ziyan vura bilər. Ancaq bu cür yağışlar faydalıdır", - deyə o əlavə edib.

------

13:44

"Hadisə dünən axşam saat 20 radələrində baş verib və qəfil gələn sel suları avtomobil yolunun tikinti aparılan hissəsinə dolub".

Milli.Az xəbər verir ki, bu barədə Oxu.Az-ın sorğusuna cavab olaraq Azərbaycan Avtomobil Yolları Dövlət Agentliyindən (AAYDA) məlumat verilib.

Bildirilib ki, qısa zaman ərzində sel sularının istiqaməti dəyişdirilib və problem aradan qaldırılıb:

"Suyun daha geniş əraziyə yayılmasının qarşısı alınıb. Nəqliyyatın hərəkətində yaranmış problem aradan qaldırılıb".

---------
10:26

Sel suları İsmayıllı-Qəbələ yolunda nəqliyyatın hərəkətini iflic edib.

Milli.Az xəbər verir ki, bu barədə oxu.az-a sözügedən yoldan istifadə edən sürücülər tərəfindən məlumat verilib. 

Sel sularının yola gətirdiyi daş, çınqıl, qırılmış ağac budaqları avtomobillərin hərəkətini çətinləşdirib.

Qeyd edək ki, sözügedən yol bir müddətdir ki, təmirdədir.

Həmçinin, Göyçaya da leysan yağıb və nəticədə sel gəlib. Seldən sonra zibillər çaya axıb və xoşagəlməz görüntü yaranıb.
 

Milli.Az

Xəbərlərimizi WhatsApp kanalımızdan da oxuyun