Xankəndidə baş verən partlayışla bağlı SON RƏQƏMLƏR açıqlandı - YENİLƏNİB - VİDEO

22:22

Ermənistan Səhiyyə Nazirliyi Azərbaycanın Xankəndi şəhərinin yaxınlığında yanacaqdoldurma məntəqəsində yanğınla müşayiət olunan partlayış hadisəsi nəticəsində ölənlərin sayını açıqlayıb.

Milli.Az report-a istinadən xəbər verir ki, səhiyyə naziri Anait Avanesyan bildirib ki, hadisə nəticəsində 125 nəfər həlak olub.

Qeyd edək ki, sentyabrın 25-də Xankəndi yaxınlığındakı yanacaqdoldurma məntəqəsində baş verən partlayışdan sonra qeydə alınan yanğın Fövqəladə Hallar Nazirliyi (FHN) Dövlət Yanğından Mühafizə Xidmətinin qüvvələrinin fədakarlığı və peşəkar fəaliyyəti sayəsində genişlənməsinə imkan verilmədən qısa müddətdə söndürülüb.

Azərbaycan dərhal hadisəyə reaksiya verib və yaralanan şəxslərə yardım məqsədilə ilkin olaraq 200 nəfərin müalicəsi üçün yanığa qarşı tibbi ləvazimatlar, sarğı materialları, əlcəklər, dərman preparatları (spreylər, kremlər, ağrıkəsicilər, antibiotiklər və s.) daşıyan təcili tibbi yardım maşını Ağdam-Əsgəran-Xankəndi yolu vasitəsilə yola salınıb.

Eyni zamanda, Saatlı, Sabirabad və Ağdam xəstəxanaları zərərçəkənlərin kütləvi qəbulu məqsədilə sürətlə hazırlanaraq xəstələri qəbul etmək üçün Bakıdan briqadalar göndərilib.

--------

09:45

Ən son məlumata görə Xankəndindəki yanacaq anbarındakı yanğın və partlayışda 290 nəfər qarabağlı erməni yaralanıb, 7 nəfər xəstəxanada ölüb. 13  meyitin isə kimliyi araşdırılır.

-------

22:26

Xankəndi baş verən partlayış nəticəsində yaralıların sayı yüzü ötüb.

Milli.Az musavat.com-a istinadən bildirir ki, yanacaq anbarında baş verən partlayışdan sonra 100-dən çox insanın həlak olub, çoxlu yaralıların olduğu bildirilir, lakin hələlik dəqiq rəqəmi müəyyən etmək mümkün deyil.

Qeyd olunur ki, insanların həyatını xilas etmək üçün zərərçəkənləri hava yolu ilə təxliyə etmək lazımdır. 

--------

19:33

Xankəndi yaxınlığında 100 tonluq yanacaq çəni partlayıb.

Milli.Az musavat.com-a istinadən bildirir ki, bu barədə Ermənistan mediası məlumat yayıb.

Məlumata görə, çoxlu yaralı var. Yaralılardan bir neçəsinin vəziyyətinin ağır olduğu bildirilir. Hadisənin necə baş verməsi barədə hələlik məlumat yoxdur.

Təfərrüatlar dəqiqləşdirilir.

Milli.Az