"Müsəlman ölkələri Qarabağı Azərbaycanın ayrılmaz tərkib hissəsi kimi tanıyır"

Misirin də içərisində olduğu müsəlman ölkələri Azərbaycanı Ermənistanla qarşıdurmasında dəstəkləyir.

Milli.Az Trend-ə istinadən xəbər verir ki, bu barədə "Nur-Mübarək" Misir İslam Mədəniyyəti Universitetinin rektoru Məhəmməd əs-Şahat Əbdülhəmid Məhəmməd əl-Cindi "İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar" mövzusunda Bakıda keçirilən beynəlxalq konfransın kuluarlarında deyib.

"Bilirik ki, Qarabağ Azərbaycana məxsusdur, Ermənistan isə Azərbaycan torpaqlarını zorla işğal altında saxlayırdı və Azərbaycan ədalətli olaraq bu torpaqları geri ala bildi", - əl-Cindi deyib.

O, tarixən Qarabağda yaşayanların əksəriyyətinin müsəlmanlar olduğunu qeyd edib.

"Digər müsəlman ölkələrinin də bu münaqişədə Azərbaycanın tərəfində olması və Ermənistan yenidən Qarabağda təxribat törədəcəyi təqdirdə Azərbaycanı dəstəkləməyə hazır olması çox vacibdir", - professor əlavə edib.

Xatırladaq ki, martın 15-16-da Bakı Beynəlxalq Multikulturalizm Mərkəzi (BBMM), Beynəlxalq Münasibətlərin Təhlili Mərkəzi (BMTM) və G20 Dinlərarası Dialoq Forumu İslamofobiya ilə Beynəlxalq Mübarizə Gününə həsr olunan "İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar" mövzusunda beynəlxalq konfrans keçirilir. Konfransın əsas məqsədi beynəlxalq və milli səviyyədə müsəlmanları və əhalisi müsəlman olan ölkələri hədəf alan həyəcanverici tendensiyaları müzakirə etmək üçün akademik platforma yaratmaqdır. Konfransda 32 ölkədən alimlər, beynəlxalq təşkilatların ekspertləri, din xadimləri və qeyri-hökumət təşkilatlarının nümayəndələri iştirak edir, islamofobiya ilə mübarizədə fərqli yanaşma, Avropanın bəzi ölkələrində islamofobiyanın təzahürləri, dünya mediasında islamofobiya mövzularında müzakirələr aparırlar.

Qeyd edək ki, 15 mart tarixinin İslamofobiya ilə Mübarizə Günü olması ilk dəfə 2020-ci il noyabrın 27-28-də İslam Əməkdaşlıq Təşkilatının Xarici İşlər Nazirləri Şurasının Niger Respublikasının Niamey şəhərindəki toplantısında elan edilib. Birləşmiş Millətlər Təşkilatının Baş Assambleyası 2022-ci ildə 15 mart tarixini İslamofobiya ilə Beynəlxalq Mübarizə Günü kimi qəbul edib.

Milli.Az