Bu festival həm müdafiə, həm kosmik texnologiyalarda bir yenilik yaradacaq - Türkiyəli tədqiqatçı

"TEKNOFEST" ilk dəfə Türkiyədən kənarda - Azərbaycanda keçirilir. Hər iki ölkə rəsmilərinin festivalda çıxışları zamanı dilə gətirdikləri fikirlər Türkiyə-Azərbaycan qardaşlığının hər sahədə olan əməkdaşlığının təzahürü oldu.

Bunu Trend-in suallarını cavablandırarkən Şanxay Universiteti Qlobal İdarəetmə Mərkəzinin tədqiqatçısı Selimhan Yeniacun deyib.

Onun sözlərinə görə, Türkiyə və Azərbaycan dövlət başçılarının "TEKNOFEST"də iştirakı 30 ildir davam edən iki ölkənin münasibətlərinin illər keçdikcə inkişaf etdiyini, möhkəmləndiyini sübut etdi.

"İkinci Qarabağ müharibəsindən sonra imzalanan Şuşa bəyənnaməsində bir çox maddədə siyasi, iqtisadi, hərbi, texnologiya sahəsində əməkdaşlıqların olacağını bilirdik. Bunun nəticəsi olaraq "TEKNOFEST" festivalı həm müdafiə, həm kosmik texnologiyalarda bir yenilik yaradacaq. Bu festival xüsusilə müdafiə sənayəsində iki ölkənin ortaq şəkildə istehsal edəcəyi yeni texnologiyalar olacağının müjdəçisi ola bilər. Düşünürəm ki, "TEKNOFEST" festivalı iki ölkənin bu günə qədər davam edən siyasi, diplomatik münasibətlərinin müdafiə sənayesi, hava qüvvələri texnologiyası sahəsində davam etməsi üçün bir başlanğıc addım olacaq" - deyə o bildirib.

Qeyd edək ki, "Teknofest" mayın 26-29-da Azərbaycanda keçirilir.

Bakıda "Teknofest" festivalı Türkiyənin Sənaye və Texnologiyalar Nazirliyi, Türkiye Teknoloji Takımı Vakfının (T3 Vakfı) təşkilatçılığı, Azərbaycan Rəqəmsal İnkişaf və Nəqliyyat Nazirliyinin tərəfdaşlığı ilə keçirilir. Eyni zamanda Bakıda "Teknofest" in "prodakşn" ofisi fəaliyyət göstərir. Ofisin tam heyəti azərbaycanlı mütəxəssislərdən ibarətdir.

"Teknofest" tədbiri Türkiyə Respublikası Sənaye və Texnologiya Nazirliyinin və Selçuk Bayraktarın rəhbərlik etdiyi Türkiye Teknoloji Takımı Vakfının (T3 Vakfı) birgə təşkilatçılığı və qardaş ölkənin 60-dan çox dövlət qurumu, ali məktəbi və özəl şirkətinin tərəfdaşlığı ilə 2018-ci ildən etibarən hər il keçirilir.

Məqsəd Türkiyədə aviasiya, kosmik sənaye, rəqəmsal iqtisadiyyat kimi sahələrin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim olunmasıdır.

Trend İnformasiya Agentliyi, Day.Az, Milli.Az, Azernews, Eastweststream, Today.az və Turkic.World "Teknofest 2022" aerokosmik və texnologiya festivalının rəsmi media tərəfdaşlarıdır.

Milli.Az