Bu model ölkəyə gətiriləndən bütün ekonom maşınların "bazarı ölüb" - 100-ə 3 litr "yandırır" - FOTO

Son aylarda Azərbaycan avtomobil bazarındakı qiymətləri, satışları cəmi bir model "alt-üst edib".

Milli.Az bildirir ki, bu Çinin nəhəng BYD şirkətinin "Destroyer 05" modelidir. Hansı ki, 0 kilometr yürüşlü modelin Bakıya gömrük xərcləri daxil çatdırılması 22 min manata başa gəlir.

İngilis dilindən tərcümədə "məhv edən" olan bu model Azərbaycanda bir çox, xüsusən də ekonom maşınların hamısının bazarını "öldürüb". Belə ki, artıq, Kia cerato, Hyundai elantra, Toyota prius, Honda insight, Kia rio və digər ekonom maşınlara maraq kəskin azalıb.

Alıcılar 24 min manata 2016-2018-ci illərin "Hyundai"sini almaqdansa, 2025-ci ilin müasir texnologiyalara malik, 0 km "BYD"sini almağa üstünlük verirlər.

Bu modeli ən çox alanlar isə iş adamları və ya sahibkarlardır. Onlar bu maşınları "Bolt"a təqdim edərək aylıq gəlir əldə edirlər.

Bəs BYD Destroyer 05 modelini almağa dəyər?

BYD Destroyer 05 modeli yanacağa qənaətcil, eyni zamanda ekoloji cəhətdən təmiz texnologiyası ilə diqqət çəkir. Bu avtomobil Plug-in Hybrid (PHEV) texnologiyasından istifadə edir ki, bu da həm elektrik enerjisi, həm də daxili yanma mühərrikindən faydalanmağa imkan verir.

Plug-in hibrid sistemi sayəsində şəhər içi qısa məsafələrdə tamamilə elektrik rejimində işləyə bilər, bu da yanacaq xərclərini əhəmiyyətli dərəcədə azaldır. Elektrik mühərrikləri yüksək sürətlənmə və səssiz iş rejimi təqdim edir, daxili yanma mühərriki isə uzun məsafələrdə əlavə güc təmin edir. BYD, avtomobillərində müasir texnologiyalar, o cümlədən ağıllı idarəetmə sistemləri və böyük məlumat ekranları təklif edir. Eyni sinifdəki digər hibrid modellərlə müqayisədə BYD adətən daha münasib qiymətə malikdir.

Lakin nəzərə alınmalı məqamlar da mövcuddur. Məsələn, BYD avtomobilləri bəzi ölkələrdə texniki dəstək və xidmət şəbəkəsi baxımından məhdudiyyətlərlə qarşılaşa bilər. Bundan əlavə, yerli bazardakı ehtiyat hissələrinin mövcudluğu da mühüm amildir.

Əgər hibrid texnologiyaya marağınız varsa və əsasən şəhər içi istifadəyə yönəlmiş, ekoloji cəhətdən təmiz və qənaətcil avtomobil axtarırsınızsa, BYD Destroyer 05 yaxşı seçim ola bilər.

İslam
Milli.Az