Satıcılar avtomobildə olan mühərrik problemlərini belə gizlədirlər

Avtomobili daha baha qiymətə satmaq istəyən vicdansız satıcılar çox vaxt, hətta mühərrik problemlərini də gizlədirlər və bunu elə edirlər ki, sanki heç bir problem yoxdur. Onlar bunu necə edirlər?

Milli.Az oxu.az-a istinadən bildirir ki, bu barədə "Rossiyskaya Qazeta"ya avtotəmir şirkətlərindən birinin təkərli texnikanın qiymətləndirilməsi şöbəsinin rəhbəri Valeri Antyufyev danışıb.

Ekspert ən çox yayılmış hiylələrdən biri kimi mühərrik silindrində aşağı təzyiqin gizlədilməsini qeyd edib. Bunun üçün bəzi satıcılar kompressiyanı yoxlamazdan əvvəl şamlar üçün dəliklərdən yanma kameralarına kiçik miqdarda mühərrik yağı əlavə edirlər.

"Bu fənd yağın müvəqqəti olaraq mikrozədələri və boşluqları doldurmasına imkan verir və süni şəkildə təzyiq göstəricilərini qəbul edilən səviyyəyə qaldırır. Benzin mühərrikləri üçün bu göstərici adətən 10-14 kq/sm2 arasında olur", - deyə Valeri Antyufyev izah edib.

"Bu fırıldağı aşkar etmək üçün mühərriki işə salmaq və kompressiyanı ölçməzdən əvvəl onu 10-15 dəqiqə neytral (xolostoy) işlətmək lazımdır. Bu, yağın axmasına imkan verəcək və mühərrikin vəziyyətinin real mənzərəsini göstərəcək", - deyə mütəxəssis qeyd edib.

Gizli yağ sızmalarını görmək üçün Antyufyev fənərlə mühərrikin arxa hissəsini diqqətlə yoxlamağı tövsiyə edir. Onun sözlərinə görə, yağdoldurma boğazı ətrafındakı sahəyə xüsusi diqqət yetirmək lazımdır - hətta kiçik çirkli izlər karterin ventilyasiya sistemində problemləri göstərə bilər.

Nəhayət, ustalar tərəfindən gizlədilməyi öyrənilən işlənmiş qazburaxma sistemi problemlərini sadə, lakin effektiv bir test vasitəsilə aşkar etmək olar.

"Mühərriki tam qızdırmaqla başlayın. Sonra qaz pedalını basılı saxlayaraq, dirsəkli valın dövrlərini dəqiqədə 3000-ə çatdırın və bu göstəricini 10 saniyə saxlayın. Bundan sonra fırlanma tezliyini kəskin şəkildə 5000 dövrə qədər artırın və qaz pedalını dərhal buraxın. Əgər mühərrikdə gizli nasazlıqlar varsa, qazı buraxan zaman işlənmiş qazburaxma borusundan xarakterik bozumtul tüstü buludu çıxacaq və mühərrikin həqiqi vəziyyətini göstərəcək", - deyə Valeri Antyufyev izah edib.

Bundan əlavə, ekspert xəbərdarlıq edib ki, bəzi satıcılar daha incə metodlara əl ata bilərlər - məsələn, benzin mühərrikinə dizel yağı tökmək və ya heç olmasa müvəqqəti olaraq problemləri gizlətməyə imkan verən xüsusi əlavələrdən istifadə etmək. Onların köməyi ilə mühərrikin səs-küyünü və işlənmiş qazın tüstülülüyünü azaltmaq, həmçinin yağ sərfiyyatını azaltmaq mümkündür.

Milli.Az

Xəbərlərimizi WhatsApp kanalımızdan da oxuyun