Ermənistan

Serj Sarkisyanın kürəkəninə cinayət işi açıldı

14 Fevral 2025 00:04

Baxış: 269

#ERMƏNİSTAN

Ermənistanın Vatikandakı sabiq səfiri, sabiq prezident Serj Sarkisyanın kürəkəni Mikael Minasyana qarşı cinayət işi açılıb.

Milli.Az xəbər verir ki, prokurorluğun məlumatına görə, ittihamlar irimiqyaslı çirkli pulların yuyulması sxemləri və qondarma strukturların yaradılması ilə bağlıdır.

İş üzrə təqsirləndirilən şəxslər arasında "Yerevan Mall"un baş direktoru Vazrik Sekoyan və sahibkar Arşak Poqosyan da var.

İstintaq iddia edir ki, Minasyana məxsus şirkətlər vasitəsilə qondarma kredit müqavilələri bağlanıb və nəticədə bu strukturların hesablarına külli miqdarda, 6,67 milyon avro və 2,764 milyon dollar vəsait daxil olub.

Daha sonra bu vəsaitlər Minasyana məxsus başqa ofşor şirkətin hesablarına köçürülüb və orada digər qeyri-qanuni aktivlərlə qarışdırılıb.

İstintaq orqanları bu hərəkətləri xüsusilə irimiqyaslı çirkli pulların yuyulması kimi təsnif edir.

Cinayət işinin üç epizodu üzrə materiallar məhkəməyə göndərilib. /APA

Milli.Az