Gecə yuxusu üçün ən ideal otaq temperaturu açıqlandı

Yuxunuzun keyfiyyətinə təsir edən ən mühüm amillərdən biri yataq otağınızın temperaturu ola bilər. Mütəxəssislərə görə, nə çox isti, nə də çox soyuq mühit idealdır; bəs dincəldici bir yuxu üçün otaq temperaturu neçə dərəcə olmalıdır?

İsti bir yay gecəsində yatmağa çalışarkən ventilyator kömək etmir, kondisionerin dərəcəsini bir az da salırsınız və bu dəfə də yatağın içində üşüməyə başlayırsınız. Təbii ki, temperatur yuxu keyfiyyətinə təsir edən ən mühüm amillərdən biridir. Bəs ideal yuxu mühiti necə olmalıdır? Yuxu tədqiqatçısı Kristin Blum bu barədə bilinməsi lazım olanları izah edir.

Milli.Az xəbər verir ki, Blumun fikrincə, yataq otağında ümumiyyətlə daha sərin temperatura üstünlük verilməlidir. Çünki bədən temperaturumuz axşam saatlarında təbii olaraq düşməyə başlayır və sərin mühit bədənin istiliyi xaricə ötürmək üçün daha az enerji sərf etməsinə kömək edir.

Blum, "Mühit temperaturu bədən temperaturundan daha aşağı olmalıdır", - deyir. Bu səbəbdən bir çox insan yüngülcə sərin olan otaqlarda daha rahat yuxuya gedir və gecə boyu daha rahat yatır. "Cleveland Clinic"in araşdırmasına görə, ideal yataq otağı temperaturu təxminən 16-19 °C arasında olmalıdır.

Ancaq burada mühüm bir detal var. Bədənimizdəki istilik itkisi böyük ölçüdə əllərimiz və ayaqlarımızdakı, dəri səthinə olduqca yaxın yerləşən incə damar şəbəkələri sayəsində baş verir. Axşam saatlarında bu damarlar genişlənərək istiliyin daha rahat xaric olunmasını təmin edir. Əgər ayaqlarınız üşüyürsə, Blumun qeyd etdiyi kimi, bu istilik mübadiləsi kifayət qədər baş tutmur və bədən yuxu rejiminə keçmək əvəzinə daha aktiv qalır.

Bu vəziyyət eyni zamanda nə üçün çox soyuq otaqlarda yuxuya getməyin çətin olduğunu da izah edir. Otaq temperaturu təxminən 16 °C-dən aşağı düşdükdə, bədən daxili temperaturunu qorumağa çalışarkən stressə girir və bu da yuxuya keçidi çətinləşdirə bilir.

Yuxu keyfiyyətinə təsir edən başqa hansı amillər var?

Daha yaxşı yatmağa kömək edə biləcək bir neçə fərqli strategiya var. Döşək seçiminə önəm verdiyiniz kimi, istifadə etdiyiniz yorğan və ya örtük də yuxu keyfiyyətinə təsir edə bilər. Bluma görə, bədən temperaturunu müəyyən bir həddə qədər yorğanın təmin etdiyi izolyasiya sayəsində tənzimləmək mümkündür. Bu səbəbdən fəslə uyğun çəkidə və qalınlıqda yorğanlara üstünlük vermək daha rahat bir yuxu təcrübəsi təmin edə bilər.

Lalə Qüdrətova
Milli.Az