Amerika

İkinci Dünya Müharibəsindən sonra ABŞ-də bir ilk: Pentaqon silah istehsalı üçün "düyməyə basdı"

16 Aprel 2026 20:21

Baxış: 1 160

VTB-də minimal faiz dərəcəsi ilə nağd kredit 9.9%-dən

#AMERİKA

Tramp administrasiyası İkinci Dünya Müharibəsi dövrünün məşhur "Demokratiya Arsenalı" konsepsiyasını yenidən canlandırmaq üçün hərəkətə keçib.

Milli.Az xəbər verir ki, Pentaqon ABŞ-nin silah arsenalını qısa müddətdə genişləndirmək məqsədilə ölkənin nəhəng avtomobil istehsalçılarını hərbi sənayeyə cəlb etmək qərarına gəlib.

"The Wall Street Journal"ın yaydığı məlumata görə, ABŞ Müdafiə Nazirliyinin yüksək vəzifəli rəsmiləri sənaye nəhənglərinin rəhbərləri ilə gizli görüşlər keçiriblər. Görüşlərdə "General Motors" (GM) şirkətinin baş direktoru Meri Barra və "Ford"un rəhbəri Cim Farli ilə yanaşı, "GE Aerospace" və "Oshkosh" kimi strateji şirkətlərin nümayəndələri də iştirak ediblər. Məqsəd mülki sənayenin nəhəng istehsal gücünü hərbi ehtiyaclara yönəltməkdir.

Analitiklər bildirirlər ki, bu təcili qərarın arxasında Ukraynadakı uzunmüddətli müharibə və İran ətrafında artan gərginlik dayanır. ABŞ-nin sursat ehtiyatlarının kritik səviyyəyə qədər azaldığını qeyd edən ekspertlər, mövcud hərbi zavodların tələbatı ödəməkdə çətinlik çəkdiyini vurğulayırlar. Pentaqon avtomobil nəhənglərinin montaj xətlərindən raket, mərmi və hərbi texnika istehsalı üçün istifadə etməyi planlaşdırır.

Ağ Ev rəhbərliyi şirkətlərdən təkcə istehsalı artırmağı deyil, həm də bu prosesi ləngidən bürokratik maneələri müəyyən etməyi tələb edib. Hökumət rəsmiləri bildiriblər ki, bu, müvəqqəti bir təşəbbüs deyil, ABŞ-nin milli təhlükəsizliyini təmin etmək üçün nəzərdə tutulan uzunmüddətli strateji hədəfdir.

Səkinə Yusifova
Milli.Az