Dünya

Putin və Merkel Donbasdakı vəziyyətdən narahatdır

8 Aprel 2021 16:54
Baxış: 448

Rusiya Prezidenti Vladimir Putin və Almaniya kansleri Angela Merkel arasında telefon danışığı olub.

Milli.Az APA-ya istinadən xəbər verir ki, telefon danışığı zamanı bir sıra aktual beynəlxalq mövzular müzakirə olunub.

Ukrayna münaqişəsinin nizamlanması ilə bağlı fikir mübadiləsi aparan Rusiya və Almaniya liderləri Ukraynanın cənub-şərqində vəziyyətin eskalasiyası ilə bağlı narahatlıqlarını ifadə ediblər.

V. Putin Kiyevin məqsədli şəkildə təmas xəttində vəziyyəti gərginləşdirdiyi ilə bağlı təxribatçı fəaliyyətə diqqəti yönəldib. Kiyev hakimiyyəti tərəfindən daha əvvəl əldə olunmuş razılaşmaların, hər şeydən öncə Donetsk və Luqanskla birbaşa dialoqun qurulmasının və Donbassa xüsusi statusun hüquqi formalaşdırılmasının icra edilməsinin vacibliyi vurğulanıb. Münaqişə tərəfləri, alternativsiz həll yolu kimi 2015-ci ilin Minsk Tədbirlər Paketini tam həyata keçirtmək üçün təmkinli olmağa və danışıqlar prosesini intensivləşdirməyə çağırılıb.

Tərəflər Suriya böhranı barədə də fikir mübadiləsi aparıblar. Suriyadakı humanitar vəziyyəti yaxşılaşdırmaq üçün tapşırıqların prioritet xarakter daşıdığı qeyd edilib.

Liviyadakı vəziyyəti də müzakirə edərkən liderlər, bu ölkədə keçid dövrü üçün mərkəzi hakimiyyət orqanlarının qurulmasını alqışlayıblar. Vəziyyətin normallaşmasına və Liviyanın dinc inkişafına töhfə verməyə hazır olduqlarını bildiriblər. Bu sahədə koordinasiyanın davam etdirilməsi barədə razılığa gəlinib.

Federal kansler tərəfindən göstərilən maraqla əlaqədar olaraq Aleksey Navalnı ilə bağlı vəziyyətə də toxunulub. V. Putinin təşəbbüsü ilə xarici medianın və hər iki ölkədəki qeyri-hökumət təşkilatlarının fəaliyyəti ilə bağlı bəzi məsələlərə baxılıb. Müxtəlif kanallar vasitəsilə yaxın iş təmaslarının davam etdirilməsi barədə razılığa gəlinib.

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.