Dünya

PKK terrorçularının Ermənistan ordusuna qoşulduğu sübuta yetirildi

29 Noyabr 2020 15:00

Baxış: 1 628

#PKK #DAĞLIQ QARABAĞ MÜNAQİŞƏSİ

PKK terror təşkilatı üzvlərinin bir qədər əvvəl Qarabağda ermənilər tərəfindən Azərbaycana qarşı döyüşmələrinə dair yeni faktlar üzə çıxıb.

Milli.Az Virtualaz.org-a istinadən bildirir ki, Türkiyə mətbuatının yazdığına görə, PKK/KCK terror qruplaşmasının qırmızı kateqoriyada axtarışa verilən qadın təşkilatının rəhbərlərindən biri Layika Gültekin bununla bağlı bir sıra etirafedici ifadələr işlədib. "Qarabağa gedib, erməni əsgərləri ilə birlikdə vuruşuruq. Erməni xalqının istədiyi vaxt yanında oluruq", - deyən Gültekin terrorçuların bir müddət əvvəl Azərbaycana qarşı mübarizə apardıqlarını bildirib.

Bütün bunlara rəğmən Azərbaycan, Rusiya və Ermənistan arasında noyabrın 10-da imzalanan Bəyanatdan əvvəl PKK terrorçularının Ermənistan döyüşçüləri sıralarında olduğu bir daha sübuta yetirilib.

Təhlükəsizlik orqanlarındakı mənbələr Türkiyə Silahlı Qüvvələrinin əməliyyatları səbəbi ilə terror təşkilatından qaçanların sayının artdığını və təşkilat daxilində böyük parçalanmanın olduğunu bildiriblər. Qeyd edilir ki, PKK-ya qoşulanların sayı azalıb. Terrorçular İkinci Qarabağ müharibəsində Ermənistanın tərəfinə keçdiklərini bildiriblər. Onlar bunun müqabilində rəsmi Yerevanın Şimali İraqda PKK-ya dəstək verməsini istəyiblər.

Vətən müharibəsi zamanı Ermənistan dəfələrlə Azərbaycanı guya Qarabağda əcnəbi muzdlulardan istifadə etməkdə ittiham edib. Düşmənin 44 gündə yalan məlumatlarla informasiya müharibəsindəki bu cür hücum cəhdlərinin əsl səbəbləri getdikcə daha aydın şəkildə ortaya çıxır - PKK terrorçularından istifadəni ört-basdır etmək.

Milli.Az