Nə pilates, nə fitnes, nə də yoqa: Bədən üçün ən sağlam idman növü bəlli oldu

Artan yaşla birlikdə milyonlarla insanın qorxulu yuxusuna çevrilən sümük əriməsi və osteoporoza qarşı hansı idmanın daha qoruyucu olduğu illərdir müzakirə edilirdi. Çinli elm adamları tərəfindən həyata keçirilən və nüfuzlu tibb jurnalı "BMJ"-də dərc olunan nəhəng araşdırma bu sahədəki əzbərləri tamamilə alt-üst etdi. 124 müxtəlif klinik tədqiqatın məlumatları təhlil edilərək 40 yaşdan yuxarı 18 mindən çox insanın izlənildiyi analizdə, sümük sıxlığının qorunmasında ən təsirli idmanın sürətli yerimək və coqqinq (yüngül qaçış) olduğu ortaya çıxıb.

Milli.Az xəbər verir ki, araşdırılan bütün məşq növləri arasında ən güclü və ardıcıl təsir göstərən sürətli yerimək-coqqinq kombinasiyası; onurğa, bud sümüyü boynu və çanağın tamamı olmaq üzrə üç kritik sümük bölgəsində birdən əhəmiyyətli sıxlıq artımı təmin etdi. Mütəxəssislər sümük sağlamlığında nəzərəçarpacaq fərq yarada bilmək üçün həftəlik müəyyən məşq həddinin aşılmasının vacibliyinə diqqət çəkirlər. Günlük ortalama 2 ilə 3 saatlıq templi yeriməyə bərabər olan bu müddətdən az qalan fəaliyyətlərdə sümük sıxlığı üzərindəki təsirlərin qeyri-kafi qaldığı vurğulanır.

Aerobik və müqavimət məşqlərinin birlikdə edilməsi də sümük sağlamlığı baxımından yüksək bal toplasa da, təsiri sürətli yeriməklə müqayisədə daha məhdud bir bölgədə qaldı. Tədqiqatçılar müntəzəm və strukturlaşdırılmış məşq proqramlarının yaşla bağlı sümük itkisini klinik olaraq əhəmiyyətli səviyyədə yavaşlatdığını və bu üsulun dərman müalicələrinə dəstək olaraq tətbiq oluna biləcəyini qeyd edirlər. Lakin bu idman reseptinin təsiri adamdan adama dəyişir; orta yaşlı və ideal çəkidə olan fərdlərdə əldə edilən fayda çox daha yüksək olduğu halda, irəli yaşdakı və ya obez fərdlərdə məşqin sümük sıxlığına töhfəsi daha az qalır.

Əldə edilən bu məlumatlar İngiltərədə təxminən 350 min nəfər üzərində aparılan digər nəhəng miqyaslı bir araşdırma ilə də tam uyğunluq göstərdi. Templi yeriməyi adət halına gətirən fərdlərdə sümük sınığı riskinin normal templə yeriyənlərə nisbətən 25 faiz daha az olduğu müəyyən edildi. Əksinə, yavaş templə yeriyən insanlarda isə osteoporoz riskinin 2 dəfədən, sınıq riskinin isə 2,2 dəfədən çox artığı aşkarlandı. Elm adamları fərdiləşdirilmiş doza və növlərdə hazırlanmış məşq bələdçilərinin sümük sağlamlığı müalicələrinə mütləq daxil edilməli olduğunu müdafiə edirlər.

Müəllif: Ülkər Vəliyeva (Milli.Az redaktor)