Dünya

Stokholmda 2019-cu il üzrə Nobel mükafatları təqdim edilib

10 Dekabr 2019 22:38
1 Şərh     Baxış: 396

Dekabrın 10-da İsveçin paytaxtında Nobel mükafatlarının təqdim olunması mərasimi keçirilib.

Milli.Az AZƏRTAC-a istinadən bildirir ki, mərasim hər il olduğu kimi, bu dəfə də 1896-cı il dekabrın 10-da vəfat edən Alfred Nobelin anma günündə baş tutub. Nobelin vəsiyyətinə uyğun olaraq, Sülh mükafatı Osloda, digər bütün mükafatlar isə Stokholmda təqdim edilir.

Stokholmda keçirilən mərasimdə fizika, kimya, fiziologiya və təbabət, ədəbiyyat və iqtisadiyyat sahələrində laureatlara mükafatlar İsveç Kralı ХVI Karl Qustav tərəfindən təqdim olunub.

Mükafatlandırma mərasimində bütün laureatlara çıxış etmək imkanı yaradılıb. Sonda Nobel mükafatı laureatları və qonaqları üçün rəsmi bayram ziyafəti təşkil edilib.

Xatırladaq ki, fizika sahəsində 2019-cu ilin Nobel mükafatına Ceyms Pibls, Mişel Meyir və Didier Kelo layiq görülüb.

Kimya üzrə mükafat müvafiq olaraq, amerikalı Con Qudinafa və onun iki həmkarına - britaniyalı M.Stənli Uittinqemə və yaponiyalı Akira Yoşinoya verilib.

Fiziologiya və təbabət sahəsi üzrə mükafatlara amerikalılar Uilyam Kelin, Qreqq L.Semenza və britaniyalı Peter Retkliff layiq görülüblər.

Builki mərasim onunla fərqlənib ki, ədəbiyyat sahəsində mükafatlar laureatlara həm 2018-ci, həm də 2019-cu illər üzrə təqdim edilib. Belə ki, 2018-ci il Nobel mükafatı polşalı yazıçı Olqa Tokarçuka, 2019-cu il üzrə isə avstriyalı yazıçı Piter Handkeye verilib.

İqtisadiyyat üzrə mükafata Hindistan əsilli amerikalı Abirjit Banerji, fransız əsilli amerikalı Ester Düflo və digər amerikalı Maykl Kremer layiq görülüblər.

Hər nominasiya üzrə pul mükafatının həcmi 9 milyon kron (təxminən 944 min ABŞ dolları) təşkil edir.

Milli.Az

loading...

Şərh yaz:

1 Şərh:

  • Anonim
    Eldəniz · 11 Dekabr 2019 07:3500

    Görəsən bizimkilər nə vaxt belə mükafat alacaq ? Axı Nobel qardaşları Azərbaycanın nefti hesabına varlaniblar indi o neft pullarından mükafat şəklində sağa sola paylayırlar....Görünən terefi odur ki, nefti varı dövləti çox olub başa bəla olmaqdansa kaş ki elm və texnologiyanın inkişafına nail olardıq ....Yaponiya kimi...,,

    Cavab yaz

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.