İŞİD Azərbaycanın şimal sərhədində

Milli.Az virtualaz.org-a istinadən bildirir ki, Bloomberg agentliyi Dağıstanda fəaliyyət göstərən radikal islamçı yaraqlıların lideri "əmir Süleymanın" internetdə yayılmış videomüraciətdə İŞİD lideri Əbu Bəkr əl-Bağdadiyə sədaqət andı içdiyini yazır.

YouTube portalında yerləşdirilmiş videoda "əmir Süleyman" meşədə, İŞİD-ə xas tünd qara geyimdə, əlində "Kalaşnikov" avtomatı təsvir olunur. O, qara geyimli, əli silahlı beş maskalı şəxs tərəfindən əhatə olunub, başlarının üstündən İŞİD bayrağı asılıb.

"Biz Auxovski mücahidləri camaatı sizə sədaqət andı içməyi qərara aldıq" - "əmir Süleyman" əl-Bağdadiyə müraciətlə bildirir.

Rus dilində, Şimali Qafqaz ləhcəsində danışan şəxs özünü "Auxovski camaatının lideri Süleyman" kimi təqdim edir. Dağıstanın terrorla mübarizə üzrə rəsmilərindən biri deyib ki, hakimiyyət həmin qruplaşma haqda məlumatlıdır və onun lideri Süleyman Zaynalabidov adlı Dağıstan sakinidir.

"Bloomberg" bu müraciəti təhlükəli hadisə kimi qiymətləndirir və bildirilir ki, Rusiyada İslam Dövlətinin nüfuzunun getdikcə artması bu terrorçu hərəkatda təmsil olunan xarici cihadçıların uğurları öz ölkələrində təkrar etməyə həvəsləndirə bilər.

"Hazırda Dağıstanda 300-dən çox şəxs İŞİD sıralarında döyüşür və onlardan 10-a yaxını geri qayıtdıqdan sonra Rusiya təhlükəsizlik qüvvələrinin keçirdiyi əməliyyatlarda öldürülüb" - deyə konsidensal informasiyanı şərh etdiyi üçün adının açıqlanmamasını xahiş edən mənbə bildirib.

Rusiya Dövlət Dumasının müdafiə komitəsinin sədr müavini Frans Klintseviç "əmir" Süleymanın əl-Bağdadiyə müraciətini şərh edərkən bildirib: "Bu, hadisələrin təhlükəli inkişafıdır, olduqca ciddi problemdir. Bu fakt daha sistemli işin başladığını, yəni "İslam dövləti"nin xərçəng şişi kimi Şimali Qafqazda yayıla biləcəyini göstərir".

Agentlik Dağıstanın Azərbaycan və Çeçenistanla sərhəd olduğunu qeyd edir. Rusiya təhlükəsizlik qüvvələri Dağıstanda müntəzəm olaraq radikal islamçı yaraqlılara qarşı anti-terror əməliyyatları keçirirlər. Şimali Qafqazda fəaliyyət göstərən "Qafqaz əmirliyi" qruplaşması indiyədək "əl-Qaidə"yə bağlı idi. Ancaq yerli rəsmi deyir ki, indi İŞİD Dağıstanda daha populyardır.  

Ehtimal olunur ki, "əmir" Süleymanın qruplaşması "Qafqaz əmirliyi"indən üz döndərib və "İslam dövləti"indən dəstək istəyir. Anti-terror ekspertləri hesab edir ki, "İslam dövləti" dağıstanlı "əmirin" sədaqət andından istifadə edərək Şimali Qafqazda güclənməyə çalışacaq.

Qeyd edək ki, bundan əvvəl "İslam dövləti"nin ideoloqları Azərbaycanı və Şimali Qafqazı da daxil etməklə "islam xilafəti"nin qara xəritəsini yaymışdılar. İŞİD-in hərbi qüvvələrinin tanınmış komandirlərindən olan, Gürcüstanın Pankisi dərəsindən getmiş "Ömər əl-Şişani" ləqəbli Tarxan Batiraşvili isə atası ilə telefon danışığında "tezliklə minlərlə tərəfdarı ilə birlikdə Rusiyaya qarşı mübarizəyə başlayacaqlarını" demişdi.

Hazırda İŞİD təhlükəsi dünya üçün ən ciddi təhdidlərdən biri olmaqla Azərbaycanı, Orta Asiya respublikalarını, habelə Rusiyanı narahat edir.

Milli.Az