Dünyanın ən yaxşı piyada gəzinti şəhərləri açıqlandı

2026-cı il üçün hazırlanan yeni araşdırma piyada kəşf edilə bilən şəhərlər sahəsində Avropanın mütləq üstünlüyünü nümayiş etdirir. 800-dən çox şəhərdə keçirilən 3600-dən çox tur və 467 min istifadəçi rəyi əsasında hazırlanan siyahıda Roma liderlik edir.

Milli.Az dünyanın ən yaxşı piyada gəzinti şəhərlərinin ilk 10-luğunu təqdim edir:

1. Roma, İtaliya
Təxminən 2800 illik tarixi olan bu şəhər siyahının zirvəsindədir. Daş döşəməli dar küçələri, Kolizey, Panteon və Vatikan kimi tarixi abidələri ilə turistləri cəlb edir.

2. Madrid, İspaniya
İspaniya paytaxtı Retiro parkı, Qran Via prospekti və Prado muzeyi ilə piyada gəzinti həvəskarlarının ən çox üstünlük verdiyi ikinci şəhər olub.

3. Budapeşt, Macarıstan
"Dunayın incisi" adlandırılan Budapeşt, tarixi Parlament binası, termal hamamları və çay kənarındakı möhtəşəm memarlığı ilə üçüncü yerdədir.

4. Praqa, Çexiya
Astronomik saat, Köhnə Şəhər meydanı və Çarlz körpüsü ilə Praqa Avropanın ən məşhur piyada marşrutlarından biri hesab olunur.

5. Lissabon, Portuqaliya
Təpəli relyefinə baxmayaraq, Alfama məhəlləsi, Jeronimos monastırı və Sao Jorge qalası Lissabonu gəzinti üçün ideal məkana çevirir.

6. Amsterdam, Niderland
Kanalları, körpüləri və UNESCO tərəfindən qorunan tarixi bölgələri ilə Amsterdam piyada kəşf üçün ən cazibədar şəhərlərdən biridir.

7. Portu, Portuqaliya
Douro çayı sahilindəki rəngarəng evləri və tarixi şərab zirzəmiləri ilə Portu siyahıda 7-ci yerdə qərarlaşıb. Şəhərin mərkəzi UNESCO Dünya İrsi siyahısındadır.

8. Barselona, İspaniya
Antoni Qaudinin əsərləri (Saqrada Familiya, Park Güell) və Qotik məhəlləsi ilə Barselona hər addımda fərqli bir memarlıq təqdim edir.

9. London, Birləşmiş Krallıq
Vestminster abbatlığı, Biq Ben və Bukingem sarayı kimi nöqtələr Londonu piyada kəşf etmək istəyənlərin əsas marşrutudur.

10. Berlin, Almaniya
Brandenburq qapısı və Berlin divarının qalıqları ilə yaxın tarixi hiss etmək istəyənlər üçün Berlin mükəmməl piyada marşrutu təklif edir.

Tokio 16 pillə irəliləyərək 20-ci, Hanoy isə ilk dəfə 35-ci sıraya qalxıb.

Nyu-York 53-cü pillədən 23-cü pilləyə yüksələrək ən sürətli irəliləyişlərdən birini edib.

"Həddindən artıq turizm" (overtourism) problemi ilə mübarizə aparan Venesiya 15-ci yerdən 91-ci yerə geriləyərək ən böyük enişi yaşayıb.

Lalə Qüdrətova
Milli.Az