İlk dəfə eşidənlər üçün: Epşteyn kimdir? - FOTO

Yetkinlik yaşına çatmayan qızları hədəf alan cinsi istismar və insan alveri şəbəkəsi qurmaqda ittiham olunan amerikalı milyarder Ceffri Epşteynlə bağlı yayımlanan yeni sənədlər qalmaqalı yenidən qlobal gündəmin mərkəzinə gətirib. Sənədlərdə tanınmış ictimai xadimlərin, siyasətçilərin və biznes dairələrindən şəxslərin adlarının hallanması mübahisələri daha da dərinləşdirib.

Artıq Epteyn işi təkcə fərdi cinayət hadisəsi kimi deyil, güc, cəzasızlıq və şəffaflıq problemlərinin simvolu kimi qiymətləndirilir. ABŞ və beynəlxalq mediada bu qalmaqal uzun illərdir müzakirə mövzusu olaraq qalır.

Milli.Az sizə Epşteyn işi ilə bağlı vacib məqamları təqdim edir:

Ceffri Epşteyn kimdir?

Ceffri Epşteyn 20 yanvar 1953-cü ildə ABŞ-ın Nyu-York ştatının Bruklin şəhərində anadan olub. Atası şəhər parklar departamentində bağban, anası isə evdar qadın idi. Epşteyn karyerasına 1970-ci illərdə Manhettendə yerləşən elit Dalton Məktəbində fizika və riyaziyyat müəllimi kimi başlayıb. Burada oxuyan şagirdlərin əksəriyyəti ABŞ-ın ən varlı ailələrinin övladları idi.

Məhz bu dövrdə əldə etdiyi əlaqələr onun həyatında dönüş nöqtəsi oldu. Müəllimlikdən ayrıldıqdan sonra maliyyə sektoruna keçən Epşteyn bir müddət "Bear Stearns" şirkətində çalışdı, daha sonra isə öz biznesini qurdu.

1988-ci ildə "J. Epstein & Company" adlı konsaltinq şirkətini yaradan Epşteyn yalnız çox yüksək sərvətə malik şəxslərə maliyyə idarəetmə xidmətləri göstərirdi. Qısa müddətdə böyük sərvət toplayan Epşteyn eyni zamanda siyasətçilər, kral ailələrinin üzvləri, məşhurlar və iri biznes nümayəndələri ilə yaxın münasibətləri ilə tanınmağa başladı.

Epşteyn işi necə ortaya çıxdı?

Epşteynlə bağlı ilk ciddi ittihamlar 2000-ci illərin əvvəllərində ortaya çıxdı. 2008-ci ildə Floridada yetkinlik yaşına çatmayan qızlara qarşı cinsi istismar ittihamları ilə üzləşən Epşteyn mübahisəli razılaşma nəticəsində yüngül cəza alaraq azadlıqda qaldı. Bu qərar illər sonra ABŞ hüquq sistemində ciddi tənqidlərə səbəb oldu.

2019-cu ildə isə Epşteyn federal səviyyədə yenidən həbs edildi. İddialara görə, o, illər ərzində qurduğu şəbəkə vasitəsilə azyaşlı qızları cəlb edir, onları varlı və nüfuzlu şəxslərlə əlaqələndirirdi. Bu istismarın əsas mərkəzlərindən birinin Epşteynin Karib dənizində yerləşən şəxsi adası - Little Saint James olduğu bildirilirdi. Ada ictimaiyyətdə sonradan "istismar adası" kimi tanındı.

Şəxsi ada, "Lolita Express" və şəbəkə iddiaları

İstintaq materiallarında Epşteynin "Lolita Express" adlanan şəxsi təyyarəsindən də geniş bəhs olunur. Şahid ifadələrinə görə, bu təyyarə vasitəsilə qızlar və qonaqlar müxtəlif ölkələrdən Epşteynin adasına daşınıb.

Epşteynin keçmiş sevgilisi və ortağı Ghislaine Maxwell azyaşlı qızları bu şəbəkəyə cəlb etməkdə təqsirli bilinərək 20 il həbs cəzasına məhkum edilib. Bu qərar Epşteyn işinin təkbaşına deyil, mütəşəkkil şəbəkə formasında fəaliyyət göstərdiyi iddialarını gücləndirib.

Epşteynin ölümü və cavabsız suallar

10 avqust 2019-cu ildə Ceffri Epşteyn Nyu-Yorkda saxlandığı həbsxana kamerasında ölü tapıldı. Rəsmi açıqlamaya görə, o, özünə qəsd edib. Lakin təhlükəsizlik kameralarının işləməməsi, nəzarət mexanizmlərindəki boşluqlar və əvvəlki təhdidlər bu versiyanın ictimaiyyət tərəfindən ciddi şəkildə şübhə altına alınmasına səbəb oldu.

Epşteynin ölümü ilə birlikdə bir çox sual cavabsız qaldı:

Bu şəbəkədə hansı nüfuzlu şəxslər yer alırdı?

Onların adları niyə tam açıqlanmadı?

Epşteynə illər boyu toxunulmamasının səbəbi nə idi?

Yeni sənədlər və davam edən mübahisələr

Son illərdə xüsusilə də 2026-cı ilin əvvəlində ABŞ Ədliyyə Nazirliyi tərəfindən açıqlanan minlərlə səhifəlik sənəd Epşteyn qalmaqalını yenidən gündəmə gətirib. Bu sənədlərdə müxtəlif ölkələrdən siyasətçilərin, iş adamlarının və tanınmış şəxslərin adlarının hallandığı iddia olunur. Bir çox adı çəkilən şəxs ittihamları rədd edir və hüquqi proseslərin davam etdiyi bildirilir.

Ceffri Epşteyn işi bu gün də dünyanın ən böyük və ən qaranlıq qalmaqallarından biri hesab olunur. Bu hadisə təkcə bir milyarderin cinayət dosyesi deyil, eyni zamanda güclü şəxslərin toxunulmazlığı, qurbanların ədalət axtarışı və sistemli istismarın necə gizlədilə bilməsi ilə bağlı ciddi suallar doğurur.

Epşteyn qalmaqalı hələ də bütün tərəfləri ilə tam aydınlaşdırılmayıb və görünən odur ki, bu iş uzun müddət dünya gündəmindən düşməyəcək.

Yeni yayımlanan sənədlər və tanınmış adlar:

Epşteyn sənədləri dünya gündəmini silkələdi - Tramp, Mask, Gates və digər məşhur adlar
Epşteyn sənədlərində şok fakt: Kəbə örtüyünün hissələri ona göndərilib
"Epşteyn" arxivində İlon Mask da var imiş... - FOTOlar

Fidan
Milli.Az