Bu dərman ABŞ-də rəsmi olaraq kütləvi qırğın silahı kimi tanındı - FOTO

ABŞ Prezidenti Donald Tramp qanunsuz fentanil və onun əsas prekursor kimyəvi maddələrini kütləvi qırğın silahları (KQS) kimi tanıyan fərman imzalayıb.

Milli.Az xəbər verir ki, bu barədə Ağ Ev 15 dekabr 2025-ci il tarixində məlumat yayıb.

Fərmana əsasən, Baş Prokurora fentanil qaçaqmalçılığı ilə bağlı işlərdə dərhal cinayət ittihamlarının irəli sürülməsi, cəzaların sərtləşdirilməsi və cəza mexanizmlərində dəyişikliklərin həyata keçirilməsi tapşırılıb. Eyni zamanda Dövlət Katibi və Xəzinədarlıq Katibinə qanunsuz fentanil və onun prekursor maddələrinin istehsalı, paylanması və satışında iştirak edən, eləcə də bu fəaliyyətləri dəstəkləyən şəxslərə və maliyyə qurumlarına qarşı aktivlərin dondurulması daxil olmaqla müvafiq tədbirlərin görülməsi göstərişi verilib.

Ağ Evin açıqlamasında bildirilir ki, fentanil hazırda 18-45 yaş arası amerikalılar üçün əsas ölüm səbəblərindən birinə çevrilib. Qeyd olunur ki, cəmi iki milliqram fentanil - təxminən 10-15 dənə süfrə duzuna bərabər miqdar - ölümcül doza hesab olunur. Rəsmi Vaşinqton kartellərin və xarici terror şəbəkələrinin fentanildən əldə olunan gəlirləri terrorizm, sui-qəsdlər və üsyanların maliyyələşdirilməsində istifadə etdiyini vurğulayır.

Sənəddə fentanilin mütəşəkkil düşmənlər tərəfindən genişmiqyaslı terror hücumları üçün silah kimi istifadə olunma potensialının ABŞ üçün ciddi təhlükə yaratdığı qeyd edilir. Məhz bu səbəbdən fentanilin KQS kimi tanınmasının federal hökumətin bütün resurslarının bu təhlükəyə qarşı səfərbər olunmasını təmin edəcəyi bildirilir.

Açıqlamada həmçinin Tramp administrasiyasının əvvəlki addımları xatırladılır. Belə ki, prezident vəzifəyə qayıtdıqdan sonra cənub sərhədində milli fövqəladə vəziyyət elan edib, bir sıra kartelləri Xarici Terror Təşkilatları siyahısına daxil edib, Meksika, Kanada və Çinə qarşı tariflər tətbiq edib və fentanillə mübarizə çərçivəsində HALT Fentanil Qanununu imzalayıb.

Ağ Ev vurğulayır ki, Prezident Tramp kartellər tamamilə dağıdılana, qanunsuz fentanil ABŞ küçələrindən silinənə və Amerika ailələri bu təhlükədən qorunana qədər mübarizəni davam etdirəcək.

Fidan
Milli.Az