Çindən xəbərdarlıq: ABŞ 2003-cü ildə İraqdakı səhvi İranda təkrarlayır

ABŞ-nin İranda yerləşən üç nüvə obyektinə hücum etməsindən sonra Çin dövlət mediası xəbərdarlıq edib ki, Vaşinqton 2003-cü ildə İraqı işğal etməklə etdiyi tarixi səhvi bu dəfə İranda təkrarlayır.

İsrail-İran müharibəsinin 10-cu günündə qorxulan baş verdi: ABŞ, Fordo, Natanz və İsfahan nüvə obyektlərini 30 "Tomahawk" raketi ilə vurdu.

"ABŞ müharibəni bitirmək üçün müharibəyə başladı"

Milli.Az xarici mətbuata istinadən xəbər verir ki, Çin Qlobal Televiziya Şəbəkəsi (CGTN) hücumlardan sonra yayımladığı məqalədə yazıb ki, ABŞ guya İsrail ilə İran arasındakı müharibəyə son qoymaq üçün birbaşa hərbi müdaxiləyə əl atıb. Bu isə onsuz da gərgin vəziyyətdə olan Yaxın Şərqdə təhlükəli bir dönüş nöqtəsidir.

Bölgə müharibəyə sürüklənə bilər
Məqalədə vurğulanır ki, Yaxın Şərq mürəkkəb bir mozaikadır - ittifaqlar, düşmənçiliklər və vasitəçilərlə aparılan münaqişələrlə doludur. ABŞ-ın İrana, onun nüvə infrastrukturu və hərbi obyektlərinə hücumu təkcə İrandan deyil, həm də onun regional müttəfiqləri və vasitəçi qüvvələrindən ciddi cavab reaksiyaları doğura bilər və bu da böyükmiqyaslı regional müharibə riskini artırır.

Məqalədə, İran və Rusiya kimi bölgədə təsir gücünə malik ölkələrin bu hücumlara necə cavab verəcəyinin hələ də naməlum olduğu vurğulanır.

"Tramp administrasiyası eyni səhvləri yenidənmi edəcək?"
Məqalədə bildirilir:

"Tarix dəfələrlə sübut edib ki, Yaxın Şərqdəki hərbi müdaxilələr gözlənilməz nəticələrə - uzanan müharibələrə və bölgənin qeyri-sabitliyinə səbəb olur. ABŞ, 2003-cü ildə səthi və təhrif olunmuş kəşfiyyat məlumatlarına əsaslanaraq İraqı işğal etdi. Nəticədə Vaşinqtonun müdaxiləsi fəlakətlə nəticələndi, bölgə üsyanlara və məzhəb qarşıdurmalarına sürükləndi."

"İşğaldan sonra İraq hələ də sabit idarəetməyə malik deyil, ölkədə milis qüvvələrinin artması, ABŞ-nin həll edə bilmədiyi struktur və təhlükəsizlik böhranları davam edir. İndi isə sual olunur: Tramp administrasiyası eyni səhvləri bu dəfə İraqdan üç dəfə böyük olan İranda yenidənmi edəcək?"

Məqalə, hərbi qarşıdurma əvəzinə dialoq və danışıqlar üçün hələ də fürsət olduğunu, və bunun həm Yaxın Şərqdə, həm də dünyada sabitliyin yeganə ümidi olduğunu vurğulayır.

Lalə Qüdrətova
Milli.Az