Yunanıstanda hoteldə yanğın: Ölən və yaralananlar var

Yunanıstanın Mərkəzində, Meteora yaxınlığında yerləşən oteldə baş verən yanğında sahibkar ölüb, 11 nəfər xəstəxanaya yerləşdirilib

Bazar ertəsi mərkəzi Yunanıstanın Meteora yaxınlığında yerləşən oteldə baş verən yanğında otelin sahibi həyatını itirib, 11 nəfər isə yaralanaraq xəstəxanaya yerləşdirilib.

Meteoranın yaxınlığında, Kalambaka şəhərində yerləşən üçmərtəbəli otel ciddi zərər görüb. Yanğınsöndürənlər 26 nəfəri, o cümlədən yaralıları xilas ediblər. Xilasetmə əməliyyatı zamanı bəzi insanlar kran avadanlığı ilə eyvanlardan endirilib.

55 yaşlı otel sahibi yanğınsöndürənlər hadisə yerinə çatmazdan əvvəl eyvandan yıxılaraq aldığı xəsarətlərdən həyatını itirib. Bölgə otelçiləri assosiasiyasının rəhbəri Kostas Papapoulios bildirib ki, sağ qalanlar assosiasiya və yerli hökumət hesabına yaxınlıqdakı digər otellərə yerləşdiriliblər. "Otel sahibi qonaqlara kömək etməyə çalışırdı və yəqin ki, özü təhlükə ilə üzləşib," deyə Papapoulios Associated Press-ə bildirib. "Onun alovlardan qaçmaq üçün eyvandan tullanıb-tullanmadığı, yoxsa tüstüdən boğularaq yıxıldığı bəlli deyil."

Otel əsasən, UNESCO-nun Dünya İrsi Siyahısına daxil edilmiş və 600 il əvvəl tikilmiş 24 pravoslav xristian monastırını ziyarət edən insanlar tərəfindən istifadə olunur. Monastırlar 550 metr (1,800 fut) hündürlükdə dik qayaların üstündə yerləşir və Afina şəhərindən təxminən 350 kilometr (220 mil) şimalda yerləşən bu ərazi qısa istirahət üçün populyar bir məkan hesab olunur. Yanğının şahidləri hadisənin sübh vaxtı baş verdiyini, bəzi sakinlərin eyvanlardan çarşaflar vasitəsilə enməyə çalışdığını bildirib. Yanğın otelin daxili hissəsini tamamilə məhv edib, otaq və dəhlizlərin divarlarını və tavanlarını qaraldıb.

Yaralananlar arasında dörd uşaq da var və onların hamısı yaxınlıqdakı Trikala şəhərindəki xəstəxanaya aparılıb. Yanğının söndürülməsi üçün 34 yanğınsöndürən və 12 texnika cəlb edilib. Yanğının səbəbi hələlik məlum deyil.


Lalə Qüdrətova
Milli.Az