"Qarabağ"ın oyunu başqa ölkəyə keçirilsə, nə baş verəcək? - UEFA susur

Çempionlar Liqasının 3-cü təsnifat mərhələsində Bakıda keçirilməsi nəzərdə tutulan "Qarabağ" (Azərbaycan) - "Molde" (Norveç) matçı ilə bağlı məlumatın UEFA-nın rəsmi saytından çıxarılması Azərbaycan futbol ictimaiyyətini narahat etməyə başlayıb. Qarşı tərəf matçın neytral meydanda keçirilməsi ilə bağlı Avropa Ali futbol qurumuna müraciət ünvanlayıb. "Molde" Norveç hökümətinin pandemiya zamanı səyahətlə bağlı müvafiq təlimatlarını UEFA-ya təqdim edib. Norveç çempionu Azərbaycana səfər etdikdən sonra karantinə alınmalı olduğunu əsas gətirərək matçın neytral meydana salınması üçün UEFA-ya "ağız açıb".

Norveç çempionunun baş məqşçisinin "Ümid edirəm ki, "Qarabağ"la oyun neytral meydanda keçiriləcək. "Onda biz bərabər şərtlərdə olardıq" açıqlaması ilə "karantin" iddialarının bəhanədən başqa bir şey olmadığını göstərib.

Milli.Az məsələ ilə bağlı "Qarabağ"ın mətbuat katibi Nurlan İbrahimovla əlaqə saxlayıb. Sözçü rəqibin Bakıya gəlmək istəməməyini belə şərh edib:

"Təkcə "Qarabağ"ın oyunu ilə bağlı yox, eləcə də "Omoniya" - "Srvena Zvezda" oyunu ilə bağlı problem var. Oyunun keçiriləcəyi tarix və yer qeyd olunmayıb. 

Əgər məsələ Bakıdan qayıdandan sonra ölkələrdə karantində saxlanılmalarıdırsa, sentyabrın 4-ü Millətlər Liqasında Norveçin Avstriyanı qəbul etməsi, "Molde"nin turu keçəcəyi təqdirdə Çempionlar Liqasının pley-off qarşılaşmasında ev-səfər oyunları oynaması o deməkdir ki, nəticədə bir həftə məsafə qalır. Bu zaman da "10 günlük karantin" məsələsi sıradan çıxır. Biz bu müddəları birləşdirərək UEFA-ya müraciət etmişik.

UEFA-nın qərarından sonra şikayət etməyimiz bir şeyi dəyişmir. Çünki UEFA hər iki tərəfi dinləyib, qərar verdikdən sonra şikayət etsək də, nə "Qarabağ", nə "Molde"nin nəticəsinə təsir etməyəcəyini düşünürəm".

Maraqlıdır ki, eyni situasiya ilə qarşılaşan Ukrayna "Dinamo"suna rəqibi "Az-Alkmar"ın Kiyevə uçuşu sarıdan Niderland tərəfindən problem yaradılmayacaq. Bu barədə Niderlandın Səhiyyə, Sosial Təminat və İdman Nazirliyindən açıqlama verilib. Nazirlikdən bildirilib ki, ölkəyə dönüşdə tətbiq edilən 10 günlük karantin tələbi idmançılara şamil olunmayacaq.

Qeyd edək ki, sentyabrın 16-da Tofiq Bəhramov adına Respublika stadionunda keçirilməli olan "Qarabağ" - "Molde" matçı saat 20:00-a təyin olunub.

Ağdam təmsilçisi 3-cü təsnifat mərhələsində Norveçin "Molde" klubunu mübarizədən kənarlaşdıracağı təqdirdə, pley-off-da "Dinamo" (Zaqreb, Xorvatiya - "Ferentsvaroş" (Macarıstan) cütünün qalibi ilə üz-üzə gələcək. "Qarabağ" pley-off-a yüksəlsə, ilk oyunu Bakıda keçirəcək.

ÇL-də pley-off mərhələsi bir yox, iki matçdan ibarət olacaq. İlk görüşlər sentyabrın 22-23-də, cavab qarşılaşmaları isə sentyabrın 29-30-da oynanılacaq.

Təhməz Əsədov
Milli.Az