Finala yüksələn Nekrasova: "Tapşırıq minimum yerinə yetirilib"

Bakıda keçirilən idman gimnastikası üzrə Dünya Kubokunda finala vəsiqə qazanmağım məni çox məmnun edir, bu gün tapşırıq minimum yerinə yetirilib.

Milli.Az xəbər verir ki, bunu Trend-ə bu gün Bakıda keçirilən idman gimnastikası ürə Dünya Kuboku yarışlarında final mərhələsinə yüksəlmiş Azərbaycan gimnastı Marina Nekrasova deyib.

O, əsasən, sabahkı yarışlara kökləndiyini bildirib.

M.Nekrasova bildirib: "Sabah daha iki sınağım var - tirdə və sərbəst hərəkətlərdə iştirak edəcəyəm. Əhvalım yüksəkdir, bu gün çıxış etmək çox həyəcanverici idi. Tribunalar tamaşaçı ilə dolu idi, bizi alqışlayırlar. Özümü ələ almağa çalışdım və çox şadam ki, qələbəyə nail oldum".

Xatırladaq ki, bu Bakıda keçirilən idman gimnastikası üzrə Dünya Kubokunda M.Nekrasova dayaqla tullanma hərəkətlərinin nəticəsinə görə final mərhələsinə yüksəlib.

Qeyd edək ki, Bakıda Milli Gimnastika Arenasında kişi və qadın idman gimnastikası üzrə FIG Dünya Kuboku mərhələsi martın 19-dək davam edəcək. Artıq ikinci ildir ki, paytaxtımızın ev sahibliyi etdiyi bu turnirdə 23 ölkədən idmançılar çıxış edəcək.

Turnirin ilk 2 günü təsnifat mərhələləri, son 2 günü isə ayrı-ayrı alətlər üzrə finallar baş tutacaq. Yeni Olimpiya dövrünün 2017-ci ildən qüvvəyə minən yeni qaydaları əsasında kişi gimnastlar 6, qadın gimnastlar isə 4 dəst medal uğrunda mübarizə aparacaqlar.

Məşhur kişi idmançılar arasında Olimpiya çempionları Elefterios Petrunias (Yunanıstan), Kristian Berki (Macarıstan), Olimpiya Oyunlarının gümüş mükafatçısı Filip Ude (Xorvatiya) və Avropa çempionu Aleksandr Şatilov (İsrail) peşəkar çıxışları ilə hər kəsi heyran edəcəklər.

Qadın idmançılar arasında isə 3 qat Olimpiya çempionu Katalina Ponor (Rumıniya) və Olimpiya Oyunlarının qızıl medalçısı Oksana Çusovitina (hazırda Özbəkistanı təmsil edir) kimi məşhur gimnastlar yer alacaqlar.

Milli.Az