İdman

Ronald Kuman istefa verdi

1 İyul 2026 09:53
Baxış: 1 061
VTB-də minimal faiz dərəcəsi ilə nağd kredit 9.9%-dən
#FUTBOL #FİFA #NİDERLAND

Niderland millisinin baş məşqçisi Ronald Kuman DÇ-2026-da komandasının mübarizəni dayandırmasından sonra istefa verdiyini açıqlayıb.

Milli.Az xəbər verir ki, 59 yaşlı mütəxəssis qərarını sosial şəbəkə hesabında paylaşaraq Niderland yığmasının baş məşqçisi kimi fəaliyyətini başa vurduğunu bildirib.

Bu qərar DÇ-2026-nın 1/16 final mərhələsində Mərakeş millisinə məğlubiyyətdən sonra verilib. Qarşılaşmanın əsas və əlavə vaxtı 1:1 hesabı ilə yekunlaşıb. Penaltilər seriyasında isə Mərakeş daha dəqiq oynayaraq 3:2 hesablı qələbə ilə 1/8 finala yüksəlib.

Niderland millisi mundialın F qrupunda uğurlu çıxış edərək mərhələni lider kimi başa vurmuşdu. Komanda İsveçi 5:1, Tunisi 3:1 hesabı ilə məğlub etmiş, Yaponiya ilə isə 2:2 hesablı heç-heçə etmişdi.

Qeyd edək ki, Ronald Kuman 2023-cü ilin aprelindən etibarən yenidən Niderland millisinin sükanı arxasına keçmişdi. O, bundan əvvəl də 2018-2020-ci illərdə yığmaya rəhbərlik edib.

Təcrübəli mütəxəssisin rəhbərliyi dövründə Niderland millisi 2019-cu ildə UEFA Millətlər Liqasının gümüş mükafatçısı olub. Komanda həmçinin AVRO-2021 və AVRO-2024-ün final mərhələlərinə vəsiqə qazanıb. Niderland yığması AVRO-2020-də 1/8 finalda mübarizəni dayandırsa da, AVRO-2024-də yarımfinala qədər irəliləməyi bacarmışdı.

Müəllif: Tural Hüseyn (Milli.Az redaktor)

Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.