İdman

Zəriflik və güc birlikdə: Azərbaycan bədii gimnastları III MDB Oyunlarına hazırlaşır - FOTO

10 Sentyabr 2025 19:52

Baxış: 607

VTB-də minimal faiz dərəcəsi ilə nağd kredit 9.9%-dən

#GİMNASTİKA

Zəriflik və güc birlikdə: Azərbaycan bədii gimnastları III MDB Oyunlarına hazırlaşır
III MDB Oyunlarına sayılı günlər qalıb və Azərbaycan bədii gimnastları intensiv məşqlərini davam etdirirlər.

28 sentyabr - 8 oktyabr tarixlərində Azərbaycan III MDB Oyunlarına ev sahibliyi edəcək. Yeddi şəhəri əhatə edəcək bu möhtəşəm idman tədbirində 23 növ üzrə yarışlar təşkil olunacaq. MDB ölkələrinin ən güclü gənc gimnastları Şəkidə bir araya gələcək.

Bədii gimnastika üzrə milli komandanın məşqçisi Nəzrin Cəfərzadənin sözlərinə görə, hazırlıq prosesi planlı şəkildə davam edir və artıq yekun mərhələyə yaxınlaşıb. "Qızlarımız hər gün intensiv məşqlər edirlər. Hazırda komanda həm fiziki, həm də psixoloji baxımdan yaxşı formadadır. Heyət ilin əvvəlindən bu günə qədər həm ölkədaxili, həm də beynəlxalq turnirlərdə idmançıların göstərdiyi nəticələr əsasında formalaşdırılıb" - deyə məşqçi bildirib.

Komandanın əsas hədəfi isə xalçada gözəl çıxışlar nümayiş etdirməkdir. "Bizim üçün ən vacib məsələ qızlarımızın məşqlərdə qazandıqları bacarıqları yarışda da uğurla göstərmələridir. Təbii ki, hər bir idmançı nəticə üçün mübarizə aparır və biz də medal qazanmaq istəyirik. Amma əsas məqsəd gözəl çıxışlardır, nəticələr isə bunun ardınca gələcək" - deyə Cəfərzadə qeyd edib.

O, həmçinin III MDB Oyunlarında rəqabətin kifayət qədər yüksək olacağını vurğulayıb: "Komandalar ciddi hazırlıqla gəlirlər və hər biri medal uğrunda mübarizə aparacaq. Bu, həm bizim üçün çətinlik, həm də böyük stimuldur. Komandamız yüksək motivasiya ilə yarışa hazırlaşır, ümid edirik ki, ölkəmizi layiqincə təmsil edəcəyik."

Milli.Az