Bu şəhərciyin "Azərsu"ya 254 min manat borcu var - VİDEO

Abşeron rayonunun Masazır qəsəbəsində yerləşən "Yeni Bakı" yaşayış kompleksinin "Azərsu"ya küllü-miqdarda borcu yaranıb. Söhbət 254 min manatlıq borcdan gedir. Sakinlər deyirlər ki, onlar su pullarını MTK-nın komendantlığına ödəyirlər. Sual ortaya çıxır: bəs sakinlərin ödədikləri pullar hara gedir? Məsələni əməkdaşımız İslam Əşrəfov araşdırıb.

Milli.Az Xəzər TV-yə istinadən xəbər verir ki, bu şəxslər ''İlin Dörd Fəsli'' MMC-nin Abşeron rayonunun Masazır qəsəbəsində inşa etdiyi ''Yeni Bakı'' yaşayış kompleksinin sakinləridir. 10 ildən artıqdır ki, 3 mindən çox mənzili olan bu şəhərcikdə sakinlərin su sayğacları rəsmi qeydiyyata alınmayıb və onlara abonent kodu verilməyib. Nəticədə burada yaşayanlar su pullarını rəsmi qaydada "Azərsu"ya deyil, hələ də MTK-ya ödəyirlər. 

Sakinlər deyirlər ki, onlardan alınan pulu şirkət özü ''Azərsu''ya ödəməlidir. Ancaq bu gün "İlin Dörd Fəsli" şirkətinin "Azərsu''ya 254 min manatdan artıq borcu yaranıb. (qəbz verilsin)

Borcun həddindən artıq çox olması vətəndaşlardan yığılan pulların ''Azərsu''ya ödənib-ödənməməsi məsələsini gündəmə gətirir. Əvvəlcə, kompleksdə fəaliyyət göstərən komendantlığa getdik. Azər adlı komendant suallarımıza cavabın yalnız baş idarədə - yəni "İlin Dörd Fəsli" şirkətində verilə biləcəyini dedi və suallarımızdan yayındı.

Şirkətin hüquqşünası isə "XəzərXəbər"ə bildirdi ki, şirkətin faktiki olaraq 254 min manat su borcu yoxdur. Çünkü ''Azərsu''yun şirkətin adına olan sayğacı 10 dəfə artıq borc yazır. O, bunun Apelliyasiya və Bakı Kommersiya məhkəmələrinin qətnamə və qərardadları ilə təsdiq edildiyini dedi.

''Azərsu'' Açıq Səhmdar Cəmiyyətindən də kompleksin sayğaclaşdırılmaması, yaranan borc məbləği və sayğacın artıq yazması ilə bağlı məsələlərə aydınlıq gətirildi. Qurumun sözçüsü Anar Cəbrayıllı bildirdi ki, sadalanan problemlərin həlli istiqamətində dünən şirkətin rəhbərliyi ilə görüş də keçirilib..

Hazırda məsələ hər iki tərəfin qarşılıqlı iddiaları əsasında məhkəmə qaydasında araşdırılır. Sakinlər isə tezliklə məhkəmənin ədalətli qərar verəcəyinə və bu məsələnin birdəfəlik həll olunacağına ümid edirlər. 

Milli.Az