Cəmiyyət

Su kanallarında niyə təhlükəsizlik tədbirləri görülmür? - VİDEO

10 İyun 2021 12:18
Baxış: 284

Suyun dərinliyindən xəbərləri belə yoxdur. Hər an kanalda boğulub həyatlarını itirə bilərlər. Bu azmış kimi, onların kanalda çimmələrinin qarşısını almaq üçün heç bir təhlükəsizlik tədbiri görülmür...

Milli.Az Xəzər TV-yə istinadən xəbər verir ki, söhbət Qarabağ kanalının Yevlax rayonu ərazisindən keçən hissəsindən gedir.

Yaxınlıqda yaşayan uşaqlar sərinləmək üçün bu kanala üz tuturlar. Ancaq onlar təhlükənin fərqində belə deyillər.

Sakinlərin sözlərinə görə, kanala nəzarət olmadığından dəfələrlə bu ərazidə ölümlə nəticələnən hadisələr yaşanıb.

Samur-Abşeron kanalının Qubadan keçən hissəsində də eyni vəziyyət hökm sürür. İstənilən şəxs bu kanala gəlib çox rahatlıqla çimə bilər. Çünki burada da təhlükəsizlik tədbirləri görülmür.

Həm Qarabağ, həm də Samur-Abşeron kanalında yaşanan bu vəziyyətlə bağlı "Meliorasiya və Su Təsərrüfatı" Açıq Səhmdar Cəmiyyətindən məsələyə münasibət bildirən olmadı.

Cəlilabadda yerləşən "İncəçay"su anbarının sahə rəisi Sahib Məmmədov isə bizə yalnız ötən gün 3 nəfərin boğulması ilə nəticələnən bədbəxt hadisənin səbəblərini açıqladı.

"Kanal nəyə görə yaxşı mühafizə olunmayıb və bundan sonra təhlükəsizlik üçün hansı tədbirlər görüləcək" kimi suallarımız isə cavabsız qaldı.

Fövqəladə Hallar Nazirliyi isə vətəndaşlara çağırış edib. Nazirlikdən ''Xəzər Xəbər''ə bildirilib ki, vətəndaşlar nəzarətsiz, qeyri-çimərlik ərazilərindən istifadə etməməlidirlər. Ümumiyyətlə, süni sututarlarda və göllərdə çimərlik salınan zaman bəzi meyarlar nəzərə alınmalıdır. Suyun dib hissəsi hamar olmalı, dərinlik 1 metr 70 santimetrdən artıq olmamalıdır. Bundan əlavə, həmin ərazilərə məhdudlaşdırıcı şarlar qoyulmalıdır.

Mövzu ilə bağlı daha ətraflı videomaterialı təqdim edirik:

Milli.Az

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.