"Rənglər" xüsusi mükafat aldı - VİDEO

RTV (Region TV) xəbər verir ki, ötən gün Beynəlxalq Muğam Mərkəzində "Azərbaycan ailəsi-2015" film festivalının bağlanış mərasimi təşkil edilib. Festival Ailə, Qadın və Uşaq Problemləri üzrə Dövlət Komitəsinin (AQUPDK), Heydər Əliyev Fondunun və BMT-nin Əhali Fondunun birgə təşkilatçılığı ilə keçirilib. Bu il müsabiqədə 24 iştirakçı tərəfindən 30 film və 94 fotoşəkil təqdim olunub. Həmin işlər Azərbaycanın görkəmli elm və mədəniyyət xadimlərindən ibarət münsiflər heyəti tərəfindən qiymətləndirilib. Qaliblər 6 nominasiya üzrə ("Ən yaxşı film", "Ən yaxşı tələbə işi", "Ən yaxşı xarici film", "Ən yaxşı TV layihəsi", "Ən yaxşı sosial çarx", "Ən yaxşı fotoşəkil") müəyyən ediliblər. Əsas mükafatlara uyğun olaraq, müvafiq dövlət qurumları tərəfindən 12 film və 5 fotoşəkil xüsusi fərqlənən iş kimi dəyərləndirilib. Müsabiqədə RTV-nin (Region TV) "Rənglər" videoçarxı da iştirak edib. Sərdar Aminin müəllifi olduğu çarx "Ən yaxşı sosial çarx" nominasiyasında xüsusi mükafata layiq görülüb.

Festivalın əsas məqsədi kinematoqrafiyanın imkanlarından istifadə etməklə ailə və milli-mənəvi dəyərlərin gənclər arasında təbliğidir. Əsas hədəflərdən biri də cəmiyyətdə bu istiqamətdə mövcud olan problemləri işıqlandırmaqla onların həlli yollarının axtarılması və ailə institutunun daha da güclənməsinə nail olmaqdır. Bu filmlərdə müsbət keyfiyyətlərlə yanaşı, vacib problemlər - erkən nikah, uşaqların, xüsusilə, qızların təhsildən yayınması, insan alveri, ailənin psixoloji vəziyyəti, sağlamlıq imkanları məhdud olan insanların cəmiyyətə reinteqrasiyası da öz əksini tapıb. Qeyd edək ki, 2011-ci ildə isə televiziyanın istehsalı və Məhsim Məhsimovun müəllifi olduğu "İşıqlı zülmət" filmi Heydər Əliyev Fondunun, BMT-nin Əhali Fondunun, Ailə, Qadın və Uşaq Problemləri üzrə Dövlət Komitəsinin birgə təşkil etdiyi "Azərbaycan Ailəsi-2011" film festivalında ən yaxşı film nominasiyasında qalib olub.

Milli.Az