Arzular, arzular, gözəl arzular...

Vizuallaşdırma insanı rahat, durğun vəziyyətindən çıxarır və hərəkət etməyə sövq edir

Ətrafımızdakı insanları müşahidə etsək, bəzilərinin arzularının yerinə yetməsini, bəzilərinkinin isə arzu olaraq qalmasını və bir müddət sonra unudulmasının şahidi olarıq. Arzuları çin olanlara çox vaxt "bəxti gətirir" deyir, o biri qrup insanları isə "uğursuz" adlandırırıq. Mütəxəssislərin fikrincə, bunun sirri fikirlərimizin bizi necə idarə etməsindədir. Arzuya, məqsədə çatmaq üçün ən əsası, bir gün bunun gerçək olacağına inanmaqdır.

Psixoloq Ruhanə Rzayevanın sözərinə görə, elə insanlar var ki, qarşısına dəqiq məqsədlər qoyur və onlara çatmaq üçün can atır. Elələri də var ki, bir gün bir şeyi, ertəsi gün ayrı şeyləri arzulayır. "Onun arzulamağı davamlı xarakter daşımır. Bu səbəbdən həyat tərzi hansısa bir səmtə istiqamətlənmədiyi üçün belə adamlar təsadüflərə söykənərək yaşayır. Yəni arzusu hadisələrin axarından asılı olaraq ola da bilər, olmaya da. Bütün gücünü arzularına həsr edənlərdə isə məqsədinə çatmaq ehtimalı daha çoxdur. Ona görə ki, həyatının hər bir sahəsini o, arzularına doğru istiqamətəndirir. Şansı əldən vermir".

R.Rzayeva bildirib ki, inanmaq insanı ruhdan düşməyə qoymur: "Düzdür, elə utopik arzular olur ki, yerinə yetməyə bilər. Amma nə qədər çox arzulasaq, arzuların yerinə yetmə ehtimalı bir o qədər çoxalır" deyən həmsöhbətimizə görə, elə də olur ki, arzular həqiqətən də yerinə yetir, amma insan buna psixoloji hazır olmadığı üçün əldə etdiyinin qədrini bilmir, özünü xoşbəxt hiss etmək əvəzinə məyus və sanki həyatdan tam "doymuş" hiss edir. Bu cür hisslər əldə etiklərinin itirilməsi və ya mənasızlaşması ilə də nəticələnir. Bu səbəbdən də, arzuların yerinə yetirilməsi texnikasına əməl etmək, əsas qızıl qaydaları pozmamaq tələb olunur: "Birinci qayda - nəyi istədiyini dəqiq anlamaqdır. Özünə sual ver: "Mən əslində nə istəyirəm?" Çox vaxt bizə lazım olmayan şeyləri arzulayır, gücümüzü gərəksiz olan şeylərə sərf edirik. Məsələn, qonşum aldığı mebeldən almalıyam, dostumun maşınından məndə də olmalıdır və s. Bu cür, heç içimizdən gəlməyən istəkləri sonsuza qədər saymaq olar".

İkinci qayda arzunun imkanlarınıza yaxın olmasıdır. Belə ki, heç bacarmadığınız və meyliniz olmayan sahədə uğur qazanmaq və başqa ağlasığmaz müxtəlif arzular xəyal qırıqlığına sala bilər.

3-cü qayda arzuların vizuallaşdırılmasıdır. Arzunu bir-iki dəfə xəyalda canlandırıb sonra unutmaq effekt verməyəcək. Arzunuz unudulmamalıdır. Hər gün özünüzə arzunuzun necə reallaşacığını təsəvvür edin. Gün olacaq ki, o, arzu həyatınızın bir hissəsinə çevriləcək. Ona görə əziyyət çəkməyə məcbur qalacaqsınız. Texnikaya görə, arzunu davamlı 2-3 ay vizuallaşdırmaq lazımdır. Bu müdət keçəndən sonra arzunu unutsanız belə, o, yerinə yetə bilər. Ən əsası düzgün vizuallaşdırmağı bacarmaqdır. Heç olmasa 10 dəqiqəlik də olsa, amma hər gün etmək şərtilə arzunu vizuallaşdırın. Bunu etməklə arzunu həqiqətən istəyib-istəmədiyinizi, bunun sizin üçün xeyirli olub-olmayacağını anlayacaqsız.

Müsahibimiz məsləhət görür ki, arzuları vizuallaşdırdıqca həqiqətən də yerinə yetdiyini hiss edib sevinin. Özünüzü xoşbəxt hiss edin.

Vizuallaşdırma insanı yeni mühitə, həyat tərzinə hazırlayır. Xüsusilə də, böyük arzular yerinə yetəndə insanın həyatı dəyişir. Məsələn, uşaq dünyaya gələndə, arzuladığın işə düzələndə. Vizuallaşdırma insanı rahat, durğun vəziyyətindən çıxarır və hərəkət etməyə sövq edir. Bu üsul həm də insanda maraq və istək oyadır, insanı həyacanlandırır. Amma arzunu gerçəkləşdirmək üçün fəaliyyətə keçməsəniz, onun gerçəkləşmə ehtimalı azalır. Hərəkət etmək - bu, dördüncü qaydadır. Texnikaya görə, tələsmək lazım deyil, səbirlə hərəkət etmək və arzunun yerinə yetəcəyinə əmin olmaq lazımdır. Hərəkət etmək arzuya çatmağın son pilləsidir. Ən həyacanlı, çətin və xoşbəxt edən son pilləsi. Amma bu mərhələ, mütləq vizuallaşdırma mərhələsindən sonra olmalıdır.

Vizuallaşdırmadan sonra ehtiyatla, ölçüb-biçərək arzunu gerçəkləşdirməyə başlayın. Arzuları gerçəkəşdirərkən hər şeyi birdən etməyə çalışmayın. Arzularınıza pillə-pillə yaxınlaşın. Əvvəlcə o qədər də böyük olmayan arzulardan başlaya bilərsiniz. Qarşınıza çıxan əhəmiyyətsiz imkanlardan, təkliflərdən imtina etməyin. Bir addım deyil, hətta yarım addımlarla addımlayın. Günbəgün ən böyük arzunuza daha çox yaxınlaşdığınızı hiss edəcəksiz. Bir müddət keçəndən sonra buna fikir vermədən belə ən böyük arzularınıza çatacaqsınız.

Psixoloq əlavə edib ki, bu qaydalara və texnikaya əməl etdikdən sonra arzularınızın daha tez-tez gerçəkləşəcəyinə fikir verəcəksiniz: "Yadda saxlayın ki, ruhdan düşmək, ümidsizliyə qapılmaq, həyatdan küsmək özünüzə qarşı olan üsyandır və arzuların gerçəkləşmə anının uzaqlaşdırır".

Ekspress.az