Aylıq telefon xərcindən necə azad olmaq olar?

İnsanlar istifadə etmədiyi bir xidmətə görə ödəniş etməyə etiraz edir. Milli.Az-a müraciət edən oxucu yazır ki, istifadə etmədiyi işıq, qaz, su və sair xidmətə pul ödəmir, amma illərlə danışmadığı telefon üçün hər ay pul xərcləmək məcburiyyətindədir:

"Biz Rusiyada yaşayırıq, amma Bakıda evimiz var. İl ərzində bir dəfə Bakıya gəlirik. Hər dəfə gələndə isə abunə haqqını ödəmədiyimizə görə nömrəmizin başqasına verildiyinin şahidi oluruq. Abunə haqqını ödəmədiyimizə görə nömrəmiz başqasına verilir. Axı danışmadığım telefona görə niyə pul ödəməliyəm? Necə etməliyik ki, evdə olmayanda, danışmayanda telefon haqqı ödəməyək?"

Bakı Telefon Rabitəsi İstehsalat Birliyinin baş direktor müavini Xankişi Kişiyev Milli.Az-a açıqlamasında bildirdi ki, Azərbaycanda limitsiz və vaxtlı olmaqla iki ödəniş sistemi var.

Direktor müavininin sözlərinə görə, vaxtlı ödəniş sistemində mobil istiqamətlərə, rayon və şəhərlərə zəng edilən zaman istifadəyə görə tətbiq olunur və pul ödənilir. Aylıq abunə haqqı isə limitsiz tətbiq olunur.

"Əvvəllər bir neçə dəfə təklif verdik ki, limitsiz ödəniş də vaxtlı ödənişə keçsin. Abonent danışdığı hər dəqiqəyə görə ödəniş etsin. Bu, böyük narazılıq yaratdı. Abonentlər ev telefonu ilə iki ödəniş sistemi edir. Lokal şəbəkədə bir ay ərzində limitsiz danışıq üçün 2 manat 50 qəpik, şəhərlərarası danışıq üçün ödənişin dəqiqəsi 5, beynəlxalq danışıq üçün isə 32 qəpikdir. Bu, beynləqxlaq standartır. Biz, sadəcə, qiyməti təyin edirik. Rusiyada aylıq abunə haqqı bizim pula çevirəndə 16 manatdır, bizdə 2 manat 50 qəpikdir. Elə adam var illərlə evinə gəlmir, ayda pulunu ödəyir".

Direktor müavini deyir ki, kim telefon haqqını aylıq vermək istəmirsə, ödənişin vaxta görə edilməsi üçün məktubla müraciət etsin: "Bundan sonra ödənişi vaxta görə etsin. Vaxta görə ödəniş sistemini isə Tarif Şurası tətbiq edir. Lokal şəbəkədə bir aylıq 5 və ya 100 dəqiqədə danışmaq olar, heç danışmamaq da".

X.Kişiyev abonentlərin nəzərinə çatdırdı ki, telefon rabitə istifadəsi qaydalarına görə 3 ay telefon haqqı ödənilməzsə, telefon müqaviləsinə xitam verilir.

Anar Məmmədov
Milli.Az