Elmi tədqiqat müəsissələrində daimi fəaliyyət göstərən viki-qruplar təşkil olunacaq

Azərbaycandakı elmi tədqiqat müəssisələrində daimi fəaliyyət göstərən viki-qruplar təşkil olunacaq, viki-mühitdə gedən proseslər barədə tədbirlər görüləcək.

Trend-in məlumatına görə, Azərbaycan Milli Elmlər Akademiyasının (AMEA) bu gün keçirilən iclasında "Wikipedia" ensiklopediyasında Azərbaycan həqiqətlərinin qorunması və inkişasında alimlərin vəzifələri" məsələsi müzakirə edilib.

AMEA-nın akademik katibi Rasim Əliquliyev deyib ki, Azərbaycan Prezidenti Adminstrasiyasından Rəyasət Heyətinə ünvanlanmış 17 dekabr 2013-cü il tarixli məktubda "Wikipedia" virtual ensiklopediyasının dünyadakı populyarlığı, əhəmiyyəti vurğulanır, Azərbaycanın dünyada daha geniş tanıdılması, düzgün təbliği istiqamətində bu resursun geniş potensial imkanlara malik olduğu göstərilir. Məktubda qeyd olunur ki, Azərbaycan "Wikipedia"da lazımi səviyyədə təmsil olunmur, bu resursda ölkəmizlə bağlı reallığa uyğun elmi məlumatlar yetərli deyil. Məktubda AMEA-nın müvafiq institutlarında "Wikipedia" üzrə xüsusi qrupların yaradılmasının zəruriliyi ifadə olunur, bu qrupların fəaliyyət istiqamətləri müəyyən edilir. Göstərilən istiqamətdə işlərin nəticələri ilə bağlı iki ay müddətində Prezident Administrasiyasına məlumat vermək xahiş olunur.

İclasda qərara alınıb ki, AMEA-nın elmi müəssisə və təşkilatlarının rəhbərləri viki-mühitin Azərbaycanla bağlı zəruri məlumatlarla zənginləşdirilməsində, onların qorunması və inkişafında fəal iştirak etsinlər. Qərara əsasən, elmi tədqiqat müəssisələrində daimi fəaliyyət göstərən viki-qruplar təşkil olunacaq, viki-mühitdə gedən proseslər barədə tədbirlər görüləcək. Həmçinin elmi müəssisə və təşkilat əməkdaşlarının "Wikipedia" layihələri üzrə fəaliyyət göstərmələri üçün zəruri biliklərə dair təlim kursları təşkil olunacaq.

İclasın qərarında vikimetrik araşdırmalara, mövcud problemlərin həllinə diqqəti artırmaq, elmi konfrans və seminarlar təşkil etmək, viki-mühitdə Azərbaycanla bağlı kontentin vəziyyətinə dair fasiləsiz və operativ monitorinqlər keçirmək də tapşırılır.

Milli.Az