ATU əməkdaşının tədqiqatı Londonda təqdim olunub - (Foto)

Azərbaycan Tibb Universitetinin (ATU) əməkdaşının elmi tədqiqatı Londonda keçirilən beynəlxalq neyroradiologiya tədbirlərində təqdim olunub. 

ATU-nun Radiologiya kafedrasının baş laborantı, doktorant Ruqiyyə Əhmədlinin tədqiqat işi XXIII Neyroradiologiya Simpoziumu, Avropa Neyroradiologiya Cəmiyyətinin 49-cu İllik İclası və Britaniya Neyroradiologiya Cəmiyyətinin İllik İclası çərçivəsində poster formatında nümayiş etdirilib. 

"İntraventrikulyar pilositik astrositomada görünən diffuziya əmsalının (ADC) dəyərləri" adlı tədqiqatda bu törəmələrin maqnit-rezonans tomoqrafiyası (MRT) xüsusiyyətləri, xüsusilə diffuziya ağırlıqlı görüntüləmə (DWI) və görünən diffuziya əmsalı (ADC) göstəriciləri araşdırılıb. 

İşdə ADC göstəricilərinin intraventrikulyar pilositik astrositomaların radioloji xarakteristikasında və digər intraventrikulyar törəmələrdən fərqləndirilməsində rolu qiymətləndirilib. 

Tədqiqatın xülasəsi beynəlxalq elmi nəşr olan "Neuroradiology" jurnalının konfransa həsr edilmiş xüsusi buraxılışında da dərc olunub. 

Dünyanın müxtəlif ölkələrindən neyroradiologiya sahəsində fəaliyyət göstərən alim və mütəxəssisləri bir araya gətirən tədbirlərin elmi proqramında müasir neyroradioloji görüntüləmə metodları, süni intellektin radiologiyada tətbiqi, neyroonkoloji xəstəliklərin diaqnostikası və invaziv neyroradiologiyada yeniliklər müzakirə edilib. 

ATU əməkdaşının tədqiqatı BMT-nin Dayanıqlı İnkişaf Məqsədlərindən (DİM) 3-cü məqsədinə - Sağlamlıq və rifahın təmin edilməsinə xidmət edir. Tədqiqatın beynəlxalq elmi platformalarda təqdim olunması isə DİM 4 - Keyfiyyətli təhsil məqsədi çərçivəsində elmi biliklərin paylaşılması və tədqiqatçıların peşəkar inkişafına töhfə hesab edilir. Tibbi görüntüləmə metodlarının araşdırılması da DİM 9 - Sənaye, innovasiya və infrastruktur məqsədinin innovasiya və elmi-texnoloji inkişaf istiqamətləri ilə uzlaşır.

Müəllif: Malik Məlikov (Milli.Az redaktor)