Hər evin qarşısında bir "tramplin": Qanunsuz maneə quraşdıranları hansı cərimələr gözləyir?

Şəhər və qəsəbələrdə, xüsusilə məhəllədaxili küçələrdə sakinlər tərəfindən quraşdırılan sürətazaldıcı maneələrin sayı son illərdə artıb. Bəzi ərazilərdə demək olar ki, hər yaşayış evinin qarşısında belə qurğulara rast gəlinir.

Milli.Az xəbər verir ki, sakinlər bildiriblər ki, bu addımın əsas məqsədi avtomobillərin yüksək sürətlə hərəkət etməsinin qarşısını almaq və uşaqların, eləcə də piyadaların təhlükəsizliyini təmin etməkdir. Onların sözlərinə görə, bəzi hallarda sürətlə hərəkət edən avtomobillər az qala qəzalara səbəb olub.

Bununla yanaşı, bir sıra sürücülər məhəllələrdə həddindən artıq sayda sürət maneəsinin quraşdırılmasından narazıdırlar. Onlar hesab edirlər ki, belə qurğuların çoxluğu nəqliyyat vasitələrinin normal hərəkətinə mane olur və avtomobillərin texniki vəziyyətinə mənfi təsir göstərir.

Mütəxəssislərin sözlərinə görə, ümumi istifadədə olan yollar və məhəllədaxili küçələrdə sürətazaldıcı maneələrin quraşdırılması yalnız aidiyyəti dövlət qurumlarının razılığı əsasında həyata keçirilə bilər. Özbaşına şəkildə yolun hərəkət hissəsində belə qurğuların yerləşdirilməsi qanunvericiliyə uyğun hesab edilmir.

Nəqliyyat sahəsi üzrə ekspertlərin bildirdiyinə görə, çoxmənzilli yaşayış binalarının həyətlərində təhlükəsizlik məqsədilə müəyyən məhdudlaşdırıcı vasitələrin quraşdırılmasına icazə verilir. Bu məsələlər yaşayış sahələrinin idarə olunmasını tənzimləyən qanunvericilik normaları ilə müəyyən edilir.

Məsələ ilə bağlı Baş Dövlət Yol Polisi İdarəsinin bölmə rəisi Toğrul Nəsirli isə qeyd edib ki, mövcud qaydalara əsasən, yolun hərəkət hissəsində sədlərin, şlaqbaumların və digər maneələrin quraşdırılması, eləcə də nəqliyyat vasitələrinin və piyadaların sərbəst hərəkətinə əngəl yaradılması qadağandır:

"Qanunvericiliyin tələblərini pozan şəxslər inzibati məsuliyyət daşıyırlar. İcazəsiz sürət maneələrinin quraşdırılmasına görə fiziki şəxslər 80-100 manat, vəzifəli şəxslər 400-500 manat, hüquqi şəxslər isə 3000-4000 manat məbləğində cərimə oluna bilərlər". 

Müəllif: Aysel Əkbər (Milli.Az müxbir)