Qorxunc proqnoz: 2026-ci ildə süni intellekt işçiləri tamamilə əvəz edəcək

Artıq 2026-cı ildə süni intellekt bir çox sahədə işçiləri tamamilə əvəz edə biləcək.

Milli.Az xəbər verir ki, bunu elmi ictimaiyyətdə süni intellektin "xaç atası" kimi tanınan Ceffri Qinton deyib. 

Qintonun sözlərinə görə, neyron şəbəkələrinin imkanları eksponensial olaraq artır. Əvvəllər diqqət sadə proseslərin avtomatlaşdırılmasına yönəlmişdisə, indi yüksək ixtisaslı kadrlar risk altındadır.

Süni intellektin sürətlə inkişafı ağ yaxalı işçilər üçün ciddi təhdidə çevrilib. Artıq bu texnologiya sadə kodlardan kənara çıxaraq bütöv layihələri müstəqil şəkildə həyata keçirməyə başlayır.

Ekspertlər bildirirlər ki, texnologiya hər yeddi aydan bir ikiqat güclənir və yaxın illərdə minimal insan iştirakı ilə mürəkkəb proqram təminatı hazırlaya biləcək.

Tədqiqatçı Qinton bu prosesi Sənaye inqilabı ilə müqayisə edərək süni intellektin yalnız iş yerlərinə deyil, həm də insan zəkasına təhdid yaratdığını vurğulayıb. O, süni intellektin düşünmə və aldatma qabiliyyətinin təhlükəli nəticələrə səbəb ola biləcəyini bildirib.

İqtisadçılar isə 2026-cı ildə "işsizlik bumu" olacağını proqnozlaşdırırlar. Şirkətlər məhsuldarlığı artırmaq üçün insan resursları yerinə alqoritmlərə üstünlük verirlər. KPMG-nin baş iqtisadçısı Dayan Svonk qeyd edib ki, "artım və əmək bazarının nəticələri fərqlidir".

Süni intellekt dövründə müəssisələr daha az insan işçisi ilə daha çox iş görməyi öyrəniblər.

Eyni zamanda, ekspertlər vəziyyətin qeyri-müəyyən olduğunu qeyd edirlər. Süni intellekt, xüsusən də mühəndislik sahəsində yeni, ixtisaslaşmış vəzifələr üçün işə qəbulu stimullaşdıra bilər.

Teneo konsaltinq şirkətinin süni intellekt üzrə rəhbəri Rayan Koks qeyd edir ki, süni intellekt bu gün işçi qüvvəsini məhv etmir, onu dəyişdirir Bununla belə, gündəlik işlərin avtomatlaşdırılacağı və bir çox mütəxəssisin yaxın gələcəkdə yenidən təlim keçməli olacağı aydındır.

Milli.Az