Cəmiyyət

Yağışlı havada özümüzü niyə üzgün hiss edirik? - AÇIQLAMA

17 Oktyabr 2025 12:43

Baxış: 909

VTB-də minimal faiz dərəcəsi ilə nağd kredit 9.9%-dən

#CƏMİYYƏT

Ölkə ərazisində müşahidə olunan yağışlı və tutqun hava şəraiti bir çox insanın əhval-ruhiyyəsinə mənfi təsir edib. İnsanların bəziləri özlərini daha halsız, ruhsuz və kefsiz hiss etdiklərini bildirirlər.

Bəs bu halın səbəbi nədir?

Milli.Az xəbər verir ki, mütəxəssislərin fikrincə, yağışlı və günəşsiz havalarda insan beynindəki bəzi bioloji mexanizmlər dəyişir.

Günəş işığının azalması serotonin hormonunun, yəni "xoşbəxtlik hormonu"nun səviyyəsini aşağı salır. Bu da insanların əhvalına birbaşa təsir edir.

Günəş işığı beyində əhval-ruhiyyəni tənzimləyən hormonların fəaliyyətini stimullaşdırır. Yağışlı havalarda isə bu proses zəifləyir, nəticədə insan özünü daha yorğun və enerjisiz hiss edir.

Eyni zamanda, hava buludlu olduqda melatonin hormonunun, yəni yuxululuq və rahatlıq hissi yaradan maddənin ifrazı artır. Bu səbəbdən yağışlı günlərdə insan daha çox yatmaq istəyir, motivasiyası azalır.

Həkim-nevroloq Elçin Qasımov isə atmosfer təzyiqinin dəyişməsi ilə bağlı bədən reaksiyalarına diqqət çəkir:
"Belə havalarda bəzi insanlarda baş ağrısı, əzələ ağrıları və ümumi narahatlıq müşahidə olunur. Bu da həm fiziki, həm də psixoloji diskomfort yarada bilər".

Sosioloqlar isə qeyd edirlər ki, insanlar yağışlı günlərdə daha az sosial fəaliyyət göstərir, evdə qalmağa üstünlük verirlər. Bu da passivliyə və bəzən depressiv əhvalın yaranmasına gətirib çıxara bilər.

Mütəxəssislər belə halların qarşısını almaq mümkün olduqca açıq havada vaxt keçirmək, fiziki aktivliyi azaltmamaq, ev şəraitində işıqlı mühit yaratmaq və sosial ünsiyyəti qorumaq tövsiyə edirlər.

Aysel Əkbər
Milli.Az