Cəmiyyət

Doğulanların sayı azalır, ailə qurmaq yaşı isə artır

10 Aprel 2025 19:50

Baxış: 1 285

VTB-də minimal faiz dərəcəsi ilə nağd kredit 9.9%-dən

#DEPUTAT #DOĞUŞ #STATİSTİKA

"Çoxuşaqlı ailə məsələsi tez-tez Milli Məclis, hökumət və cəmiyyət tərəfindən müzakirə mövzusu olur".

Milli.Az xəbər verir ki, bunu Milli Məclisin Əmək və sosial siyasət komitəsinin sədri Musa Quliyev bu gün keçirilən komitə iclasında "Əmək pensiyaları haqqında" Qanunun müzakirəsi zamanı bildirib.

"Ümumiyyətlə, baxmaq lazımdır ki, dünya ölkələrində çoxuşaqlı ailə anlayışı necədir, neçə uşaqdan ibarətdir? Hesab edirəm ki, biz bütövlükdə demoqrafik inkişaf haqqında dövlət proqramının qəbul olunması barədə düşünməliyik. Bütün dünyada bu proseslər gedir. Ona görə də insanların təbii artımı aşağı düşüb. 10-12 il əvvəl bizdə 150-160 min uşaq doğulurdusa, indi onların sayı 100-110 mindir. Ona görə də çoxuşaqlı ailə anlayışında sayı azaltmaq barədə düşünmək olar. Onda biz spesifik yanaşmanı da tətbiq edə bilərik", - deyə komitə sədri bildirib.

Dövlət Statistika Komitəsinin məlumatına görə, doğulanların sayı azalır, ailə qurmaq yaşı isə artır. Əgər bu belə davam edərsə, əhali sayı azala bilər.

Sosioloqlar bu azalmanın ciddi siqnal olduğunu bildiriblər.

Sosioloq Mail Yaqub bildirib ki, bizim ölkənin əhali sayı azdır. Son 5 il ərzində Azərbaycanda təbii artım nəzərə çarpacaq dərəcədə dəyişib. 2020-ci ildə ölkədə 126571, 2024-cü ildə isə 102310 uşaq dünyaya gəlib. Sadə dildə desək, son 5 ildə doğulanların sayı 24 min azalıb.

Aysel Əkbər
Milli.Az