Avtomobilə qaz avadanlıqları hansı şərtlər altında quraşdırılmalıdır?

Son illərdə yanacaq xərclərini azaltmaq istəyən bir çox sürücü avtomobillərinə qaz avadanlıqları quraşdırmağa üstünlük verir. Lakin bu tip modifikasiyalar həm müsbət, həm də mənfi cəhətləri ilə diqqət çəkir. Qazla işləyən avtomobillərin təhlükəsizlik baxımından müəyyən riskləri olduğu üçün, sürücülərin bu addımı atarkən diqqətli olmaları vacibdir.

Bəs qaz avadanlıqları hansı şərtlər altında quraşdırılmalıdır?

Məsələ ilə bağlı təhlükəsizlik məsələləri üzrə ekspert Elmar Nuraliyev açıqlama verib:

"Qaz avadanlıqlarının keyfiyyəti və düzgün quraşdırılması avtomobilin təhlükəsizliyi üçün çox önəmlidir. Keyfiyyətsiz və ya standartlara uyğun olmayan avadanlıqların quraşdırılması qaz sızmalarına, yanğın riski və digər təhlükəsizlik problemlərinə səbəb ola bilər. Bununla yanaşı, avadanlıq düzgün montaj olunmazsa, qaz sızması nəticəsində qəza vəziyyətləri baş verə bilər. Qazın avtomobilin tankında düzgün saxlanması və yanma prosesi də risklər yarada bilər. Həddindən artıq təzyiq və ya tankın zədələnməsi qazın partlamasına səbəb ola bilər. Yanacaq qazı təbii olaraq partlayış riski yaradır, buna görə də qazın saxlanma şəraiti ciddi şəkildə nəzarət altında olmalıdır. Qazlı sistemin quraşdırılması avtomobilin mexanizminə əlavə yük qoyur və bu, mühərrikin daha tez tükənməsinə və ya digər mexaniki problemlərə səbəb ola bilər. Əgər qaz sistemi düzgün tənzimlənməzsə, mühərrikdə ciddi zədələr baş verə bilər. Bununla yanaşı, qazla işləyən avtomobillər daha çox texniki qulluq tələb edir".

O qeyd edib ki, bir çox ölkədə avtomobillərdə qaz avadanlıqlarının istifadəsi üçün xüsusi qanunlar mövcuddur. Avtomobilə qaz quraşdıran sürücülər, bunun üçün müvafiq icazə və sertifikatlar almalıdırlar. Həmçinin, qazlı avtomobillərin sığorta məsələləri də xüsusi tələblərə tabedir. Sığorta şirkətləri qaz sistemi olan avtomobilləri daha yüksək riskli hesab edərək əlavə sığorta haqqı tələb edə bilər.

Avtomobillərə qaz avadanlıqları quraşdırmaq müəyyən risklər daşıyır, amma düzgün quraşdırma, keyfiyyətli avadanlıqlar və texniki baxım ilə bu risklər minimuma endirilə bilər. Sürücülər qaz avadanlığı quraşdırmadan əvvəl, müvafiq ekspertlərdən məsləhət almalı və təhlükəsizlik standartlarına uyğunluğa diqqət etməlidirlər.

Aysel
Milli.Az