Aydan Salahovanın “Qız Qalası” layihəsi Azərbaycan Milli İncəsənət Muzeyində açıldı - (Foto)

Azərbaycan Milli İncəsənət Muzeyində tanınmış rəssam Aydan Salahovanın "Qız Qalası" adlı fərdi layihəsinin açılışı olub. Heydər Əliyev Fondu, Azərbaycan Respublikasının Mədəniyyət Nazirliyi və Azərbaycan Milli İncəsənət Muzeyinin birgə təşkilatçılığı ilə reallaşan layihə "Bakıya uçuş. İncəsənət Həftəsonu. Gələcəyi İNDİ duy" festivalının proqramına daxildir.

Aydan Salahovanın yaradıcılığında heykəltəraşlıq və rəngkarlıq əsas yer tutur. "Qız Qalası" layihəsində bu iki sənət sahəsi sərgi məkanı ilə dialoq yaradaraq vahid bədii mühit formalaşdırır. Əsərlər və muzeyin memarlığı sərgi təcrübəsinin ayrılmaz hissəsinə çevrilir, tamaşaçıya tanış mədəniyyət simvolunu yeni vizual və emosional müstəvidə qavramaq imkanı verir.

Layihənin mərkəzində Azərbaycan mədəniyyətinin əsas rəmzlərindən biri olan Qız Qalası dayanır. Rəssam bu abidəyə yalnız memarlıq nümunəsi kimi deyil, əsrlər ərzində əfsanələr və şifahi ənənələr vasitəsilə formalaşmış mədəni obraz kimi yanaşır. Bakının şəhər mənzərəsinin ayrılmaz hissəsi olan qala haqqında hekayələr zamanla kollektiv yaddaşın bir parçasına çevrilib.

Qız Qalası əfsanəsinin faciəvi sonluğu layihənin başlanğıc nöqtəsidir. Lakin Salahova hamıya tanış olan bu hekayəni dəyişməz həqiqət kimi qəbul etmək əvəzinə, ona yeni baxış təqdim edir və tamaşaçını düşündürür: bu əfsanə mütləq bizə həmişə danışıldığı kimi bitməlidirmi?

Rəssam heykəltəraşlıq, rəngkarlıq və sərgi məkanının imkanlarından istifadə edərək əfsanəni özünəməxsus şəkildə yenidən şərh edir. Bu yanaşmada Qız Qalası tarixi abidə olmaqla yanaşı, tanış hekayənin fərqli cür inkişaf edə biləcəyi bədii məkana çevrilir. Layihə əfsanənin qəhrəmanının taleyinə də yeni baxış təklif edir.

Sərgi keçmişdən miras qalan hekayə ilə müasir dövrün baxışı arasında dialoq qurur. Tamaşaçılar alternativ sonluq barədə düşünməklə yanaşı, yaddaşımızda qorunan hekayələrin necə ötürüldüyünü və zamanla mənalarının necə dəyişdiyini yenidən nəzərdən keçirməyə dəvət olunurlar.

"Qız Qalası" layihəsi Azərbaycan mədəni yaddaşında dərin kök salmış bir obrazı müasir baxış bucağından təqdim edir və bizə miras qalan hekayələrin yeni mənalar qazanaraq yenidən şərhə açıq olduğunu göstərir.

İnformasiya dəstəyi - Trend.Az, Day.Az, Milli.Az, Azernews.Az