Şou-biznes

Ruhəngizin düz ayaqları, əməkdar Anar, "Aygünü söyün" kampaniyası, ağacla sevişən Elza - HƏFTƏBECƏR

13 Mart 2017 09:15
30 Şərh     Baxış: 7 311
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Milli.Az jurnalist İntiqam Valehoğlunun müəllif layihəsi olan "Həftəbecər"i (117-ci say) təqdim edir.

Əməkdar artist Ruhəngiz Allahverdiyeva sosial şəbəkədə onun haqqında tənqid yazanları vecinə almır. Özü belə deyib. Bildirib ki, yaşına uyğun geyinmədiyini söyləyənlərin dedikləri heç onun vecinə də deyil. Bu arada vec insanın hansı hissəsində olur, araşdırdım. Maraq üçün siz də araşdıra bilərsiniz. Amma bir az çətin olacaq:

"Yazsınlar, vecimə də deyil. O yazanların səhifəsi ancaq bağlı olur. Biz adi insanlar deyilik, müğənniyik. Hər şeyin əndazəsi var, yaraşanı geyinirik. Əyri ayaqlarımı bayırda qoymuram ki..."

Orda bir cümlə var ha, diqqətlə oxuyun. Deyir ki, adi insanlar deyilik, müğənniyik. Bax sonra camaat deyəndə ki, filankəs müğənnidir, ondan nə istəsən gözləmək olar. O zaman sənətçilər hurrey eləyirlər ki, nə danışırsınız, biz də sizlərdən biriyik. Ancaq mənim fikrimcə, elə ən doğru etirafı Ruhəngiz Allahverdiyeva edib. Bəli, o, adi insan deyil, müğənnidir, əməkdar artistdir. Özünün də nə az, nə çox, düz 62 yaşı var. Ayaqları da əyri deyil...

Bir sənətçi var. Axır vaxtlar tez-tez dadlı-duzlu söhbətlər edir, adət-ənənədən danışır. Hələ o vaxt toyuna da jurnalistləri buraxmamışdı və mənə hələ də maraqlıdır ki, hansı jurnalist onun toyunda iştirak etməyə belə həvəsliydi. Nəysə, sözüm onda deyil. Hamilə həyat yoldaşı ilə fotosunu paylaşıb. Görünür, belə bir məcburiyyət varmış.

Akademik Milli Dram Teatrının aktyoru Anar Heybətov, nəhayət ki, layiq olduğu əməkdar artist fəxri adını aldı. Məncə, Anarın yetərincə pərəstişkarı və tamaşaçısı var. Biz də təbrik edirik.

Xalq artisti Aygün Kazımova sosial şəbəkədə belə bir status yazıb:
"Şərhləri bağlamayacam. Ürəyiniz istədiyinizi qədər söyün, təhqir edin, səhvlər tutun. Bir sözlə, neqativlərinizi, stresslərinizi atın. Canlarım mənim, mənə xoşdur. Təki sizə bir balaca da olsa, xoş olsun".

Xahiş edirəm, Aygünün xahişinə burada əməl etməyin. Amma kim istəsə, profilini tapıb ürəyini boşalda bilər. Bu, həm də gənc sənətçilərə bir xalq artisti nümunəsidir.

Rəqsanə bir maşın fotosu paylaşıb və ərinə yazıb ki, "krısalıq eləmə". Doğrudan da, ailədə mehribançılıq başqa zaddı. Gör mehribançılığın, səmimiyyətin dozası nə qədərdisə, Rəqsanəyə maşın almaq məsələsi ictimai müzakirəyə çıxarılıb. Rəqsanənə şükür, ilahi!

Aparıcı Könül Muxtarova deyib ki, həyatımın Bred Pitini gözləyirəm. Bred Pit bu açıqlamanı oxusa, vəssalam. Onsuz da, Ancelinayla araları sərindi. Bir də gördün üç günə Bakıdadır.

Elza Seyidcahan təzə şeir yazıb. Şeir belə adlanır - "Ağacla sevişirəm, seks olmasa, həyat olmaz". Qulpqoyan dayı burada qulağıma pıçıldayır ki, ağacdan muğayat ol, bala.

Xalq artisti Yalçın Rzazadə deyib ki, anlamıram, villa nə olan şeydir. Heç də təəccüblü deyil. O villalardan bir gecəyə şou ulduzları çıxıblar e, Yalçın müəllim.

Çoxdandır sizə əhvalat yazmıram. Bəlkə birini yazım? Deməli, günlərin birində ana qızının evinə qonaq gəlir. Görür ki, ev dağınıqdır, qablar sınıb.

- Qablar niyə sınıb?
- Dalaşmışıq.
- Bəs divan?
- Barışmışıq.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.