Teleaparıcı Mikayıl: "Məgər mən erməniyəm?"

"Space" telekanalında yayımlanan "Sevimli şou" verilişinin aparıcısı Mikayıl Güləddinoğlu son zamanlar həmkarlarının onun barəsində səsləndirdiyi tənqidi fikirlərə cavab verib

Güləddinoğlu publika.az-a açıqlamasında əvvəlcə ANS-in "İncə maraqlar" verilişinin aparıcısı Elnarə Təhməzovanın müsahibəsində işlətdiyi bu ifadələrə cavab verib:

"Həftənin bir günü dostlarım mənə yazırlar ki, "Space"-ə bax, "palatka toyu" başladı. Mən həmin verilişdə tamaşaçıların plastmas stullarda əyləşdiyini görmüşəm. Düzdür, "Space" mənim ilk iş yerim olub. Amma bilmək istəyirəm ki, o kanalın plastmas stuldan başqasına pulu çatmır? Bu, yəqin ki, aparıcıya və kanalın özünə hörmətdən irəli gələn bir şeydir. Bir kanalın ki aparıcısını tanımadın, deməli... O aparıcı məndən inciməsin. İnsanın daxili necədirsə, verilişini də elə qurur".
 
Mikayılın Elnarəyə cavabı belə olub:

"Aparıcının aparıcı haqqında o sözü deməyini başa düşmürəm. Mən həmin xanımı tanıyıram. Özü də çox yaxşı tanıyıram Elnarəni. Başa düşmürəm, bu nə deməkdir? Bunu kənardan hansısa müğənni, yaxud başqa peşə sahibi desəydi, anlaşılardı. Xanımdır, mən ona nə deyim? Ayrı söz demək istəmirəm. Allah canını sağ eləsin. Amma mənim Azərbaycan teleməkanındakı əksər aparıcılarla yaxşı münasibətlərim var, bir çoxları ilə dostluq edirik. Elnarə ilə şəxsi ünsiyyətim yoxdur. Çox təəssüf edirəm".
 
M.Güləddinoğlu jurnalist İlhamiyyə Rzayevanın bir müddət öncə onun barəsində işlətdiyi "çoban" ifadəsinə isə sərt şəkildə reaksiya verib:

"Bununla ikinci dəfədir ki, belə hal olur. Adı yadımdan çıxdı. O da aparıcı olub,  "Space"-də aparıcılıq edib, eynəkli xanımdır. Hə, indi yadıma düşdü, İlhamiyyə Rzayeva. O da təxminən belə bir müsahibə vermişdi. Anlaya bilmirəm ki, həmkarlarım niyə mənə qarşı belə mövqe tuturlar? Bu nəyə görədir? Məgər mən erməniyəm? Mən də bir azərbaycanlı oğluyam. İndiyə kimi nəinki aparıcıya, heç kimə güldən ağır kəlmə söyləməmişəm. Son qəpiyim qalsa, həmkarıma verərəm ki, təki onun işi düzəlsin, mən "Space"-dən evə piyada da gedərəm. Mənə də maraqlıdır ki, bu məsələnin altında nə dayanır? Özüm də tapa bilmirəm".
 
Qeyd edək ki, bir müddət öncə İlhamiyyə Rzayeva da Mikayıl Güləddinoğlu barədə sərt açıqlama ilə çıxış etmiş, hətta onu "çoban" adlandırmışdı:

""Space"də Mikayıl Güləddinoğlunun "Sevimli şou"su tənqid edilir ki, orada "palatka toyu" qurublar. Ancaq həm də verilişin başlamasını dördgözlə gözləyirlər. Nədir Azərbaycan tamaşasını "palatka" səviyyəsinə endirən? Mikayıl kimdir, "Space" indi nədir? Bilmirəm. Amma əvvəllər "palatka" toyları əla olurdu. Hər şey öz yerində, öz təbiətində gözəldir. Çoban dağ qoynunda, dərədə quzuları otarıb tütək çalanda gözəldir, mənalıdır, hətta bir az romantikdir. Məsələn, gəlib "Space"də veriliş aparanda yox".

Milli.Az