"400 manat maaşla dolanıram, pensiya da almıram" - Babəkin "oğlu"

Milli.Az xəbər verir ki, musavat.com-un növbəti həmsöhbəti "Babək" filmində canlandırdığı "Buğday" rolu ilə tanınan aktyor, pedaqoq Məhəmməd Verdizadədir. Uzun illər Rusiyada yaşayan 67 yaşlı aktyor 2016-cı ildə Azərbaycana dönüb. O, hazırda Teatr Xadimləri İttifaqında çalışır.

- Məhəmməd bəy, ittifaqda işiniz nədən ibarətdir?

- Aktyor laboratoriyasının rəhbəriyəm. Məni teatra işə götürmədilər, dedilər ki, pensiya yaşımdayam. Halbuki 67 yaşım olsa da, pensiya almıram. Ona görə də "Azdrama"nın rəhmətlik direktoru Azər Paşa Nemətov 2021-ci ildə məni ittifaqda işləməyə dəvət etdi. Çünki yaşıma görə heç yerdə işə götürmürdülər.

- Niyə pensiya ala bilmirsiniz?

- Qocalığa görə pensiya almaq üçün gərək işdən çıxım. İşdən çıxıb necə dolanım? Mənə 220 manat pensiya verəcəklər. Çünki iş stajım azdır, heç 25 ilə çatmır. İttifaqda isə 400 manat maaş alıram. 400 manatı 220 manata dəyişim?

- 10 ildir ki, Rusiyadan Azərbaycana dönmüsünüz. Bu illər ərzində başqa harada çalışdınız?

- Heç yerdə məni işə götürmədilər. Mən rejissorluq və aktyorluq üzrə ixtisaslı müəlliməm. Buna görə də Mədəniyyət və İncəsənət Universitetinə müraciət etmişdim, ancaq işə çağırılmadım. Onu da qeyd edim ki, 1981-ci ildən 1991-ci ilə kimi bu universitetdə dərs demişəm, qayıdandan sonra isə götürmədilər.

- Bəs nə ilə məşğul oldunuz?

- İş tapa bilmədiyim üçün heç nə ilə məşğul olmadım.

- Seriallara çəkilirsinizmi?

- Bəli, hazırda 13 seriyalı bir serialda çəkilirəm. Ona qədər isə 6-7 seriala çəkilmişəm. Rusiyada iki böyük serialda çəkilmişəm. Ümumilikdə isə kinonun durumu ürəkaçan deyil, məni qane etmir.

- Övladlarınızdan yolunuzu davam etdirən varmı?

- Yox. İki qızım var, onlardan biri Amerikada yaşayır, digəri isə Azərbaycandadır. Ailəlidirlər, iki nəvəm var. Övladlarımdan yolumu davam etdirən olmadı.

- Mərhum aktyorumuz Rasim Balayevlə münasibətiniz necə idi? Sonuncu dəfə nə zaman görüşmüşdünüz?

- Bəzən yanına gedirdim, söhbət edirdik. Səhhəti pis idi, çox görüşə bilmirdik.

- İşsizlikdən çətinlik çəkdiyinizi yəqin ki, bilirdi. Bununla bağlı hər hansısa kömək təklif etmişdimi?

- Onun böyük səlahiyyətləri yox idi, nə edə bilərdi ki? Bir dəfə söhbət edən zaman harada işləməyimlə bağlı soruşdu, ittifaqda çalışdığımı dedim, ümumi vəziyyətimi açıqladım. Dedi, bizdə də eyni vəziyyətdir.

- Rusiyada nə işlə məşğul olurdunuz?

- Bizneslə məşğul idim. 1997-ci ildə Azərbaycanda kino sahəsində vəziyyət çox pis idi, dolanmaq olmurdu. Mən də ailəli adam idim, ona görə Rusiyaya getməyə məcbur oldum.

- Nə əcəb geri dönməyə qərar verdiniz?

- Orada 18 il bizneslə məşğul oldum və sonra qərar verdim ki, vətənə geri qayıdım. Nə qədər qərib ölkədə qala bilərdim ki...

- Geri qayıdanda daha əvvəlki məşhurluq olmadı?

- Tanıyanlar indi də yaxınlaşıb görüşürlər, şəkil çəkdirirlər. Başqa nə olsun ki...

Lalə Qüdrətova
Milli.Az