"Bədənimdə drenajlar var idi, səhnəyə çıxdım" - FOTO

"Ümumdünya Xərçəng Günü" çərçivəsində təşkil edilən tədbirdə pop musiqisinin tanınmış simalarından Hande Yener də qonaq olub. Erkən diaqnoz sayəsində döş xərçəngini məğlub etməyi bacaran sənətçi tədbir zamanı keçirdiyi çətin günləri bölüşərkən duyğulu anlar yaşayıb.

Milli.Az xəbər verir ki, altı il əvvəl döş xərçəngi diaqnozu qoyulan və müalicəsini uğurla başa vuran Hande Yener panel zamanı şəxsi təcrübəsini bölüşərək, erkən müayinənin həyat qurtardığını vurğulayıb:

"Həyatımda məni yoran, əsəbiləşdirən o qədər çox şey var idi ki... İnsanlar, münasibətlər, dostluqlar. Özümü dəyərsizləşdirmişdim və başqalarının da bunu etməsinə icazə verdiyimi anladım. Bir az arıqlamışdım. Estetik baxımdan döşlərimi yoxlayarkən əlimlə bir şiş hiss etdim. Əslində pis bir şey olacağını düşünən biri deyiləm, amma o an içimdə qəribə bir hiss yarandı. 'İçimdə bir şey var' dedim" .

Məşhur müğənni müayinəyə gecikmədən getdiyini bildirib:

"Ayaqqabılarımı geyinib dərhal həkimə getdim. Müayinəyə getmək insanın özünə verdiyi dəyərin göstəricisidir. Texnologiyanın bu qədər inkişaf etdiyi, erkən diaqnozun bu qədər vacib olduğu bir dövrdə bundan qorxmaq mənə doğru görünmür."

Cərrahi müdaxilə prosesindən danışarkən göz yaşlarını saxlaya bilməyən Yener bunları deyib:

"Həkimim 'Buraya silikon qoymalıyıq' deyəndə mən 'Mənim üçün fərqi yoxdur' dedim. Çünki edəcək çox şeyim var idi - oğlum, itlərim, sevdiklərim... 'Ən doğru nədirsə, onu edin' dedim."

Əməliyyatdan sonra mükafatlandırma mərasiminə qatıldığını deyən sənətçi yaşadıqlarını belə xatırlayıb:

"Mənə bunun mənim üçün yaxşı ola biləcəyi deyildi və tərəddüd etmədən qəbul etdim. O vaxt pandemiya idi, böyük mərasim olmayacaqdı. Əməliyyatdan sonra bədənimdə drenajlar var idi. Çiyin altı detalları olan bir gödəkçə tapdıq və drenajları gizlətdik. Qızıl Kəpənək Mükafatlandırma Mərasiminə belə getdim. O vaxt nələrdən keçdiyimi heç kim bilmirdi. Çünki insan bəzi şeyləri əvvəlcə özü qəbul etməlidir, sonra danışa bilər."

Hande Yener çıxışının sonunda xərçənglə mübarizədə erkən diaqnozun həyati əhəmiyyət daşıdığını bir daha vurğulayaraq, hər kəsi mütəmadi tibbi müayinələrdən keçməyə çağırıb.

Fidan
Milli.Az