Yaddaşlarda “Aşıq Yediyar” kimi qalan əməkdar artist kim idi? - VİDEO - FOTO

Xəbər verdiyimiz kimi, tanınmış aktyor, Əməkdar artist və Şuşa Dövlət Musiqili Dram Teatrının direktoru Yadigar Muradov dünyasını dəyişib.

Milli.az mərhum sənətkarın həyat və yaradıcılığı ilə bağlı geniş məlumatı sizə təqdim edir:

Kim idi Yadigar Muradov?

Yadigar Muradov Azərbaycan teatr və televiziya sənətinin tanınmış simalarından biri, uzun illər Şuşa Dövlət Musiqili Dram Teatrına rəhbərlik etmiş Əməkdar artist idi.

O, 18 dekabr 1958-ci ildə Ağdam rayonunda anadan olub. 1980-ci ildə İncəsənət İnstitutunun dram və kino aktyorluğu fakültəsini bitirib.Yaradıcılığa Ağdam Dövlət Teatrında başlayıb. Daha sonra Şuşa Mədəni-Maarif Texnikumunda aktyorluq və səhnə danışığı dərsləri verib.1990-cı ildə Şuşa Dövlət Musiqili Dram Teatrı yaradıldıqdan sonra Yadigar Muradov bu teatrın direktoru vəzifəsini icra edib və uzun illər teatrın inkişafında mühüm rol oynayıb.

Sənətkarın sənət fəaliyyəti yüksək qiymətləndirilib - ona "Əməkdar artist" fəxri adı verilib, həmçinin "Tərəqqi" medalı ilə təltif olunub.

"Qulp" verilişindəki unudulmaz obrazları

Yadigar Muradov geniş tamaşaçı auditoriyasına xüsusilə ANS kanalında yayımlanan məşhur "Qulp" verilişi ilə tanış idi.

Sənətkar illər əvvəl bu proqramın daimi iştirakçısı kimi, teatrın digər aktyorları ilə birlikdə bir çox maraqlı personajlar yaradıb. O dövr üçün aktual olan sosial və siyasi mövzulara satirik yanaşmaları ilə tamaşaçıların rəğbətini qazanmışdı. XX əsrin sonlarında ölkədə ən çox izlənən verilişlərdən olan "Qulp"dakı çıxışları Yadigar Muradovun populyarlığını daha da artırmışdı. Xüsusilə Qarabağ məsələsi ilə bağlı siyasi proseslərin uzanmasına həsr etdiyi satirik mahnılar həmin dövrdə cəmiyyətdə böyük təsir doğururdu.

Yadigar Muradov ailəli idi və üç övladı var. Oğullarından biri, Yaşar Muradov Salyan Dövlət Kukla Teatrının direktorudur, digər oğlu Üzeyir Muradov isə həkimdir.

Sənətkar uzun müddət onkoloji xəstəliklə mübarizə aparırdı. Oktyabr ayında vəziyyəti pisləşdiyi üçün xəstəxanaya yerləşdirilmişdi.

Allah rəhmət eləsin!

Fidan
Milli.Az