Şou-biznes

“Son nəfəsimə qədər döyüşəcəyəm” – Erik Deynin səssiz fəryadı

5 Oktyabr 2025 13:00

Baxış: 1 527

VTB-də minimal faiz dərəcəsi ilə nağd kredit 9.9%-dən

#ŞOU-BİZNES

Hollywood aktyoru Erik Deyn amiyotrofik lateral skleroz (ALS) diaqnozu ilə çətin günlər keçirir. Səssizcə verdiyi mübarizə və son açıqlamaları milyonlarla insanın qəlbini sarsıdıb.

"Grey's Anatomy" serialındakı Dr. Mark Sloan obrazı ilə məşhurlaşan Deyn bu il "Emmy 2025" mükafat mərasimində çıxış etməli idi. Lakin səhhətindəki ağırlaşma səbəbindən son anda səhnəyə çıxmaqdan imtina edib.

Milli.Az xəbər verir ki, sentyabrın 30-da Vaşinqton hava limanında görüntülənən aktyorun əlil arabasında olması diqqətdən qaçmayıb. Jurnalistlərin səhhəti ilə bağlı sualına o, yalnız bir cümlə ilə cavab verə bilib:

"İnancınızı itirməyin, qardaşım..."

Əllərindəki funksiyanı artıq itirdiyini bildirən Erik Deyn, ayaqlarında da eyni problemin yarana biləcəyini açıqlayıb. Aktyor yaxın günlərdə siyasətçilərlə görüşərək ALS xəstələri üçün dəstək proqramlarının artırılması, ictimai maarifləndirmə və maliyyə yardımının zəruriliyini vurğulayıb.

Görüş zamanı duyğusal anlar yaşayan aktyor belə deyib:

"Qızlarımın universiteti bitirdiyini, ailə qurduqlarını, bəlkə də bir gün nəvə sahibi olduğumu görmək istəyirəm..."

Amansız xəstəliyə baxmayaraq, Erik Deyn nikbinliyini qorumaqda israrlıdır:

"Son nəfəsimə qədər bu xəstəliklə savaşacağam".

Qeyd edək ki, aktyor bu ilin əvvəlində ALS diaqnozunu ictimaiyyətlə bölüşmüş və o vaxtdan bəri həyat mübarizəsinə səssiz, amma inamlı şəkildə davam etdiyini bildirmişdi.

Milli.Az