“Qusarda 400 manat, Moskvada 100 dollar” - Kimisi dincəlir, kimisi isə…

Yay mövsümü gəlib çatdıqda məşhurların istirahət marşrutları da izləyicilərin marağına səbəb olur. Kimisi dincəlmək üçün xaricə üz tutur, kimisi isə ölkə daxilindəki gözəl guşələri seçir. Bəziləri möhtəşəm fotolar və videolarla tətilini nümayiş etdirərək gündəm olur, digərləri isə iş qrafikinin sıxlığı səbəbindən istirahətə vaxt ayıra bilmir. 

Milli.Az yenisabah.az-a istinadən tanınmış simaların yay tətili planları və seçdikləri məkanlarla bağlı maraqlı açıqlamalarını təqdim edir.

Əməkdar artist Təyyar Bayramov bildirib ki, hələlik istirahətə vaxt ayıra bilməyib: pizza mizza

"Hələ ki, tətilə çıxmamışıq. Başımız qarışıb Heydər Əliyev fondunun dəstəyi ilə həyata keçirilən Muğam müsabiqəsinə. 3-4 aydır ki, bu müsabiqə ilə məşğulam. Orada tələbələrimiz var. Bu ayın 25-i Laçında final mərhələsi keçiriləcək. Ona görə də hələ ki, istirahətə vaxt ayıra bilməmişik. Müsabiqə bitəndən sonra bəlkə bu haqda nəsə düşünə bilərik".

Müğənni Mənzurə Musayeva isə tətil üçün Türkiyə və Moskvaya getdiyini bildirib:

"Tətilimiz artıq bitib. Hazırda iş başındayıq, amma iki dəfə ölkə xaricində olduq. Bir dəfə də nəvələrim və övladlarım ilə rayonda istirahətə yollandıq. Tətil günlərində Türkiyə və Moskvada oldum. Qiymətlər xaricdə daha sərfəlidir. Məsələn, Qusarda otelin bir gecəsi 400 manatdırsa, Türkiyədə 150 dollar, Moskvada isə 100 dollardır. Ona görə də bölgələrimizdə dincəlmək büdcə olaraq sərf etmir".

Aşıq Zülfiyyə tətildə dincələ bilmədiyini və toylarda iştirak etdiyini qeyd edib:

"Heç dincələ bilmədim. Toylarımız çox oldu. Bir az da işlərlə bağlı problemlər yaşadıq. Tətil bitməmiş bir həftəlik də olsa, Tovuza getməyi düşünürəm. Mənimçün dünyanın ən gözəl guşəsi oradır. Özümü orada çox rahat hiss edirəm. Ölkə xaricinə çıxmağı isə düşünmürəm. 

Əməkdar artist İlkin Əhmədov tətil günlərini Şamaxıda keçirdiyini deyib:

"Yay istirahətində Şamaxıda və Bakıda oldum. Başqa getdiyim bir yer olmadı. Şamaxıda qohumumuzun evi var, orada dincəldik. Otellərə getmədiyim üçün qiymətlərdən xəbərim yoxdur. Ölkə xaricinə çıxmağı da düşünmürəm. Hələlik elə bir planım yoxdur. Olsa belə, gərək öncədən qərarlaşdıraq. İnşallah yaxın gələcəkdə qiymətlər hər kəs üçün münasib olar, insanlar da büdclərinə uyğun şəkildə tətilin dadını çıxarda bilər". 

Milli.Az