Serdar Ortaç: “Bir lirə də istəmirəm, sadəcə əl-ayağımı geri istəyirəm”

Türkiyənin məşhur pop ifaçısı Serdar Ortaç şəxsi həyatına dair səmimi və bir o qədər də kədərli açıqlamalar verib.

Milli.Az xəbər verir ki, o, youtuber Orkun Işıtmakın "Çəhrayı yalanlar" adlı proqramında iştirak edərək həm səhhətindəki problemləri, həm də qumar səbəbilə yaşadığı çətinlikləri etiraf edib.

Serdar Ortaç proqram zamanı yalan detektoruna qoşularaq, ona ünvanlanan suallara dürüst cavablar verib. Məşhur sənətçiyə "Qumarda 50 milyon dollara yaxın pul itirdiyiniz deyilir. Bu doğrudurmu?" sualı verildikdə, o cavabında dəqiq rəqəm açıqlamasa da etiraf edib:

"Sual belə verilsə daha düzgün olar: "Qumarda çox pul itirmisinizmi?" - Bəli, itirdim. Qumar iyrəncdir. Qumar ailəni, pulunu, evliliyini, sağlamlığını məhv edir. Məhv etməyəcəyi heç nə yoxdur. Sadəcə 3 lirə qazanmaq üçün 300 lirəni itirirsən".

Ortaç qumarın həyatında buraxdığı dərin izlərdən də danışıb:

"İntihar etmə nöqtəsinə gəlirsən. Psixoloji tarazlığın pozulur. Dostların səni tərk edir. Borc tapmağa çalışırsan, gecə saatlarında kimlərəsə zəng edib pul istəyirsən. Bu, insanın öz dəyərini aşağı salır".

Sənətçi, borclarını ödəmək üçün müəllif hüquqlarını başqalarına icarəyə verdiyini də bildirib. Lakin bunu "satmaq" adlandırmır:

"Bunu satmaq deyil. Sadəcə sən başqasına verirsən, o da sənin üçün toplayır. Çünki onları toplamağa gücüm çatmır. Bu gəlirlərimi bağışlayacağam. Qoy bir neçə qurum öz haqqını alsın. Onsuz da atam qədər, 69 yaşa qədər yaşasam yetərlidir".

MS xəstəliyindən əziyyət çəkən Ortaç "Pul xoşbəxtlik gətirirmi?" sualına isə bu ürəkağrıdan cavabı verib:

"Əlbəttə, pul xoşbəxtlik gətirir. Amma sağlamlığı ala bilməz. Pul yalnız saxta xoşbəxtlik gətirir. Mən bir lirə də istəmirəm, sadəcə əl-ayağımı geri istəyirəm. Bütün pullarım getsin, amma sağlamlığım qayıtsın".

Kənan
Milli.Az