Şou-biznes

Tarzən Zamiq Əliyev: "Özünə hörmət edən sənət adamı efirdə hər gün görünməz"

21 Aprel 2025 09:01

Baxış: 1 176

VTB-də minimal faiz dərəcəsi ilə nağd kredit 9.9%-dən

#XALQ ARTİSTİ

"O vaxtlar" verilişinin yeni buraxılışı yayımlanıb.

Proqramın budəfəki qəhrəmanı Xalq artisti, tarzən Zamiq Əliyev olub.

Zamiq Əliyev televiziya verilişlərində az-az görünməsinin səbəbini belə izah edib:

"Mən o kanaldan bu kanala qaçmıram, sadəcə özümə layiq olan proqramlara qatılıram. Bu gün sənətçiləri ancaq efir vasitəsilə tanıyırlar. Özünə hörmət edən sənət adamı efirdə hər gün görünməz. Gərək izləyici sənin üçün darıxsın, verilişdə səni görəndə kanalı dəyişdirməsin. Təəssüf ki, indiki sənətçilərimiz hər gün efirdədir, bir gündə 5 dəfə kanala çıxırlar. Bu, düzgün deyil, xalqın gözü tərəzidir. Sənət adamı yaradıcılığı ilə millətə özünü sevdirməlidir".

Xalq artisti, həmçinin Azərbaycanın qədim və zəngin musiqi janrı olan muğam sənətinə marağın azalmasından şikayətlənib:

"Təəssüf ki, bu gün muğamın meydanı yoxdur. Muğam ifaçılarımızın hamısı mahnı oxuyur. Əlbəttə, onları qınamıram. Çünki muğam oxuyana qulaq asan yoxdursa, nə etsinlər? Mahnı oxumalıdırlar ki, onları da toya çağırsınlar. Buna görə də muğamımız ikinci cərgədə, arxada qalıb".

Zamiq Əliyev keçmiş və indiki sənətçilər arasındakı münasibətlərdən də danışıb. O, vaxtilə sənət adamları arasında birliyin olduğunu xatırladıb:

"Bizim gəncliyimiz Filarmoniya bağında keçərdi. Çünki toy məclislərinə xanəndə aparmaq üçün həmişə oraya gələrdilər. Baş tərəfdə xanəndələr əyləşirdilər. Biz isə böyük sənətkarları - Hacı Məmmədov, Həbib Bayramov, Sərvər İbrahimov və digərlərini görəndə gizlənərdik ki, onlarla üz-üzə gəlməyək. Bir-birimizə qarşı çox böyük hörmət var idi". (baku.tv)