"Putin demək istədi ki, burada söz sahibi Azərbaycandır" - Politoloq

"Rusiya dövlət başçısı Vladimir Putin regiondakı reallıqlara nəzər salaraq öz münasibətini açıqlayıb". 

Bunu Milli.Az-a açıqlamasında "Cənubi Qafqaz" politoloqlar klubunun rəhbəri İlqar Vəlizadə üçtərəfli bəyanatın əhəmiyyətini şərh edərkən deyib.

Politoloq bildirib ki, burada bir vacib məsələ ondan ibarətdir ki, Putin əslində bizim üçün yeni bir şey deməyib:

"Biz onun Qarabağın Azərbaycanın tarixi torpağı olduğunu bildirməsini həmişə demişik. Sadəcə, onun bu cür mövqeyi, hər şeyi açıq şəkildə şərh etməsi ermənilər üçün yeni idi. Çünki biz özümüz həmişə demişik ki, Rusiyaya görə, Qarabağ Azərbaycan torpağıdır. Putin dolayı, sətiraltı ifadələrlə bu mövzuya münasibət bildirirdi, heç vaxt açıq demirdi. Amma artıq mövqeyini açıq bildirdi. Çünki Ermənistanda indi etiraz aksiyaları artır, bilirik ki, orada çoxları baş verənlərə görə Rusiyanı günahlanıdırır. Rusiya bu açıqlamaları 6 ay qabaq desəydi regionda vəziyyət başqa cür də cərəyan edə bilərdi. Ümumiyyətlə hamı hər şeyi öz adı ilə danışsaydı, desəydi, yaxud da təhlil etsəydi, bəlkə də müharibə də olmazdı. 

Putinin bu açıqlamaları gələcək üçün çox vacibdir. O qeyd etdi ki, Dağlıq Qarabağ, ətraf rayonlar Azərbaycan torpağıdır. Əgər Azərbaycan torpağıdırsa, demək burada söz sahibi Azərbaycandır, bu bölgənin gələcəyi ilə bağlı hər hansısa bir razılaşmanın söz sahibi kimi Azərbaycan çıxış edir. Bu da bizim üçün çox vacib bir amildir. Biz bundan istifadə edib, bundan sonrakı danışıqlar prosesinin gedişatına təsir göstərə bilərik". 

İ.Vəlizadə onu da qeyd edib ki, Rusiya liderinin Türkiyəylə bağlı mövqeyi isə bunu deməyə imkan verir ki, qardaş ölkə bu bölgənin gələcəyinin müəyyənləşdirilməsində yaxından iştirak edəcək:

"Rusiya dövlət başçısının Türkiyəylə bağlı dediyi "Qarabağ məsələsində Türkiyəyə hər hansı bir qiymət verə bilərsiniz, ancaq beynəlxalq hüququ pozmaqda günahlandırıla bilməzsiniz" açıqlamasına da zəmin yaradan hadisə odur ki, Türkiyə sentyabrın 27-də başlayan müharibəyə müdaxilə etmədi, Azərbaycana mənəvi dəstək verdi, heç bir beynəlxalq hüququ pozmamışdı. Bu da Türkiyənin apardığı düşünülmüş, uzaqgörən siyasətdən, bölgədə sülhün tənzimlənmsindəki rolundan xəbər verir. Türkiyə burada konstruktiv rol oynayır və əlbəttə ki, bu rol ona imkan verir ki, digər ölkələrlə yanaşı bu bölgənin gələcəyinin müəyyənləşdirilməsində də yaxından iştirak etsin". 

Qeyd edək ki, Rusiya Prezidenti Vladimir Putinin "Rossiya-24" telekanalına müsahibəsi zamanı Dağlıq Qarabağla bağlı suala "Beynəlxalq hüquqa görə, Qarabağ həmişə Azərbaycanın ayrılmaz hissəsi olub, Kollektiv Təhlükəsizlik Müqaviləsi Təşkilatı müdaxilə edə bilməz. Heç kim Ermənistana təcavüz etmir" cavabını verib. 

Təhməz Əsədov
Milli.Az